– Sámi vuođđo- ja joatkkaskuvlla ohppiin lea vuoigatvuohta oažžut seamma fálaldaga sámegielas ja sámegillii go dáža vuođđo- ja joatkkaskuvlla oahppit ožžot dárogielas ja dárogillii, dadjá NSR/SáB sámediggeáirras Trond Are Anti. NSR/SáB evttohii danin ođđa ášši ”kártet ja evalueret sámi ohppiid vuođđo- ja joatkkaskuvlla oahppu fálaldaga” Sámedikkis.
– Lea dárbu kártet ja evalueret ollásit sámi ohppiid vuođđo- ja joatkkaoahppu fálaldaga. Ulbmilin kártemin ja evalueremin lea čielggadit ožžot go sámi oahppit seamma fálaldaga sámegielas ja sámegillii go dáža oahppit ožžot dárogielas ja dárogillii. Dát galgá leat vuođđun diehtit gokko lea váilevašvuohta ja mii galgá dahkkot vai ožžot dan seamma fálaldaga, dadjá Trond Are Anti.
Ášši láhkavuođđu lea oahpahuslága § 6-2 mas celko ahte ohppiin sámi guovllu vuođđoskuvllain vuoigatvuohta oažžut oahpahusa sámegielas ja sámegillii. Anti muitala ahte dán čavčča lea 4 jagi áigi máhtolokten sámi oahppoplánabuvttus doaibmagođii. Jos oahppit galget oažžut kvalitatiivalaš oahpahusa máhtolokten mielde, de gáibiduvvo ahte reaiddut leat sajis sihke ohppiide ja oahpaheddjiide. Anti namuha reaidduid nugo girjjit sámegillii Máhttolokten sámi oahppoplánabuvttadusa mielde, oahpaheaddjibagadusat ja erenomaš oahpponeavvut ja -materiálat.
Dát kárten ja evalueren galgá čielggadit leat go doarvái oahpponeavvut sámegillii máhttoloktema mielde, ja makkár váilevašvuođat leat. Eará gažaldat leat go oahpaheddjiin sámi vuođđoskuvllain seamma eavttut ja reaiddut sámegillii go oahpaheddjiin dáža skuvllain.
– Mu mielas lea erenoamáš dehálaš kártet lea go sámi ohppiin, geat rahčet omd. čállin- ja lohkanváttisvuođain, seamma fálaldagat ja reaiddut sámegillii go dáža ohppiin lea dárogillii, loahpaha Anti.
----------
På norsk / darogillii
Kommenter denne artikkelen
Tips en venn Gå tilbake