NSR ádde ollásit go Luonddugáhttensearvi ja Luondu ja nuorat searvi leaba guoddalan Sydvaranger Gruve AS politiijáide nuoskkidanlága rihkkumis. Galggašii ráŋggáštuvvot kemikálaluoitima dihte Báhččaveaivutnii, nu go boahtá ovdan Fiskeribladet Fiskaren áviissas gaskavahku geassemánu 2.b.

NSR oaivvilda ahte jos  Sydvaranger Gruve AS beassá luoitit mirkkuid nugo lea ohcán, dat boahtá garrasit váikkuhit ekosystemii ja borramušbuvttadeapmái Báhččaveaivuonas. Dát livččii ášši mas Klima- ja forurensningsdirektorat berrešii duostat cealkit ahte kemikálat máid Sydvaranger Gruve AS lea ohcan lobi luoitit, boahtá čuohcat vuona ealáhahkii, erenoamážit luossanállái máid našunála luossavuonaid stáhtus gálggašii suodjalit.

– Dás lea mii nu mii lea áibbas jorgut. Olmmoš oažžu dan áddejumi ahte jus beare leat doarvái fámolaš, de gal oaččot bilidit árvvolaš eallima birrasis, lohká Norgga Sámiid Riikkasearvvi  doaibmi jođiheaddji Gunn-Britt Retter. Nu go juo Mátta-Várjjat servvodat bures diehtá, de nohká ruvkedoaibma goas nu. Dan sadjái livččii guolli agibeaivái resursan go dan ceavzilit hálddaša. Mis ii leat várri dán bilidit. Buohtastahttin dihte de illá oažžu boazodoallu Fylkka birasgáhtten eiseválddiin lobi jávistit orgánalaš njuovvanbázahusaid mat guohcagit áiggi mielde eatnamis, go oaivvildit dát nuoskkida luonddu. – Ii leat man ge láhkái jáhkehahtti birasgáhttenpolitihkka jos Sydvaranger Gruve AS galgá beassat luoitit máŋggageardánit eanet bistevaš kemikála doabbariid, ja mas eat dieđe boahtte áiggii váikkuhusaid, joatká Retter.

NSR vuorddášii Borramušbearráigeahču loktet jiena áššái. Dás lea sáhka dearvvašvuođavára biirra  go olbmot bivdet vuonas masa stáhta lea bidjan árvvu našunála luossavuotnan. Báhččaveaivuotna lea našunála luossavuotna mas luossanálli galgá suodjaluvvot erenoamážit, ja gos stuorát sisabahkkemat ja doaimmat main lea erenoamáš nuoskkidanvárra, eai leat lobalaččat. – Muhto orru leamen nu ahte jos lea doarvái fámolaš, de vissa oažžu mirkkuidahttit našunála luossavuonaid, seammás  go mearraluossabivdit fertejit gierdat gáržžidit ealáhusbivdduideaset suodjalan dihte luossanáli, loahpaha Retter.

----------

På norsk / darogillii