– Lean ovttaoaivilis oahpaheddjiin Sissel Gaupain gii dadjá sámi oahpaheaddjit ja sámi oahppit dárbbašit ođđa ja ođasmahtton oahpponeavvuid, cealká sámediggeáirras Silje Karine Muotka.

– Sámi mánát fertejit birget boares oahpponeavvuiguin guhkit go eará mánát, ja dát leat duođalaš ášši, joatká Muotka. Sámi mánát ja oahpaheaddjit dárbbašit ođđa, buori oahpponeavvuid, juste nu mo eará mánát ožžot.

– Sámediggepresideantta Egil Olli áigu oastit boares oahpponeavvuid, ja dat čuohcá ođđa oahpponeavvoráhkadeapmái. Ođđajagisártnistis čuoččuhii presideanta ahte sámi mánát leat beassan eret stensiillain, ja geažuhii Sámedikki leat čoavdán oahpponeavvohástalusa.

– In leat presideanttain ovttaoaivilis. Oahpponeavvohástalus ii leat čovdon, cealká Muotka ja oaivvilda sámediggepolitihkkáriid ain fertet bargat sámi skuvlla hástalusain. – Dálá oahpponeavvut eai lea heivehuvvon Máhttoloktemii, ja oahpaheaddjit šaddet ieža heivehallat oahpponeavvuid ja geavahit dasa ollu áiggi mii galggašii geavahuvvot oahpaheapmái.

Silje Karine Muotka vuorrástuvvá go Sámedikki eanetlohku vuoruha eambbo ruđa politihkalaš dássái, go sámi mánáin  ja oahpaheddjiin váilot ođđa ja ođasmahtton oahpponeavvut. – Sámediggi ferte ipmirdit makkár hástalusat sámi ohppiin ja oahpaheddjiin leat ja háhkat ohppiide ja oahpaheddjiide seammá buriid oahpponeavvuid go eará ohppiin leat.

----------

På norsk / darogillii