– Mii oaivvildit skuvlaheaittiheapmi garrasit goarida fálaldaga sámi ohppiide Romssas ja Davvi-Norlánddas, cealká NSR joavkojođiheaddji Aili Keskitalo. NSR maiddai šálloša ahte máŋggaid jagiid ovdánahttinbargu skuvllas masa sihke Sámediggi ja Romssa fylkasuohkan leat bidjan návccaid dál mollana.

Sámediggi ja Romssa fylkasuohkan vuolláičálle jagi 2002 historjjálaš ovttasbargošiehtadusa oktasaš initiatiivvaid ektui máŋggaid servodatsurggiin, buorrin sámiide geat orrot Romssas. Dát šiehtadus lea doaibman buorre ovdamearkan Sámedikki ja guvllolaš eiseválddiid oktavuođas eará fylkkain, ja Sámediggi lea maŋŋil dahkan sullásaš ovttasbargošiehtadusaid eará fylkasuohkaniiguin. Ovdánahttit sámi fálaldaga fylkasuohkanlaš joatkkaskuvllain Romssas lea leamaš stuora oassi ovttasbarggus gaskal Sámedikki ja Romssa fylkasuohkana, masa goappašat bealit leat bidjan návccaid máŋggaid jagiid. Skániid joatkkaskuvla lea leamaš čuovgadoardnan dán barggus. 

– NSR bivdá Sámedikki čielggadit lea go heaittiheami mearrádus ovttasbargošiehtadusa rihkkun dahje luohttevašvuođa rihkkun ovttasbargobeliid gaskal, cealká Aili Keskitalo. – Skuvlaheaittiheapmi lea goitge guhkes lávki maŋos ovttasbarggu ektui Romssa fylkasuohkaniin.

-----------

Ovttasbargošiehtadus gaskal Sámedikki ja Romssa fylkasuohkana