– Ii go Sámedikki posišuvdna oainne dan dehálaš barggu maid Sámi mánáid- ja nuoraidteáhter dahká, dadjá sámediggeáirras ja NSR politihkalaš nubbinjođiheaddji Trond Are Anti. – Teáhter lea mielde nannemin ja ovddideamen sámegiela. Teáhter váikkuha ahte sámegiella gullo almmolaš oktavuođain. Neaktin sámegillii maid váikkuha ahte mánáid- ja nuoraid iešdovdu ja sámi identitehta nannejuvvo.   

Deanu kulturskuvla lea otne njunnožis sámegiela mánáid- ja nuoraidteáhtera suorggis sámegiellaguovlluin Norggas. Sámi mánáid- ja nuoraidteáhtera ásaheami višuvdna lea šaddat sámi resursaguovddážiin. Áigumuš lea ásahit "Sámi mánáid teáhter". Dán teáhteris galget sámi mánát buvttadit sámi teáhtera sámegillii sámi mánáide ođđa sámi dramatihkain. Ásahus galgá šaddat sámi kulturguovddáš gosa mánát olles Sámis, Suomas, Ruoŧas, Ruoššas ja Norggas galget boahtit Detnui teáhterfága kursii.

Anti čilge ahte teáhtera ulbmil ja áigumuš lea nu buorre ahte dat ii sáhte nohkat dasa. Áiggun čuovvulit ášši Sámedikkis ja gávdnat ruhtadeami dasa. Anti loahpaha ahte doaibma mii lea nu deaivil nannemin ja ovddideamen mánáid ja nuoraid sámegiela geavaheami ja seammás maid nannemin sin iešdovddu ja sámi identitehta ii sáhte orustuvvot. Anti lohpida čuovvulit ášši ja iige áiggu vuollánit buoril.

-----

På norsk / dárogillii