NRK1 čájehii golggotmánu 6. beaivvi dokumentára”Kasta på land” mii čájeha mo mearrasámit Finnmárkku rittus leat massán iežaset vuoigatvuođaid. Vaikke Ráđđehus lea vuigen eahperehálaččat meannudan mearrasámiid ja vuotnaguolásteddjiid ja vaikke leat bidjan olu návccaid guorahallanbargguide riddoguolástuslávdegottis, de lea ovddeš guolástusministtar Helga Pedersen geažidan ahte riddoguolástuslávdegotti bargu biddjo eret.
Álggahan juo barggu
- Mis ii leat vejolašvuohta dán dohkkehit eat ge mii sáhte vuollánit. Norgga Sámiid Riikkasearvi (NSR) lea gearggus joatkit rahčamušaid oažžut mearrasámiid vuoigatvuođaid dohkkehuvvot. Mii leat juo álgán geahčadit ieš guđet lágan vejolašvuođaid ovddidit ášši, muitala NSR organisatuvrralaš nubbinjođiheaddji Gunn-Britt Retter.
NSR áigu lagamus áiggis deattuhit čuovvovaš bargguid:
1. Lea erenoamáš dehálaš ahte dál šaddet duohta konsultašuvnnat gaskal Sámedikki ja Guolástusdepartemeantta. Sámediggi ferte ovdalgihtii dahkat vuđolaš ovdabarggu, ja maiddái deattuhit Ráđđehussii ahte sámiid bealis leat čielga vuordámušat ahte dat evttohusat maid Riddoguolástanlávdegoddi lea buktán lea unnimus maid mii sáhttit dohkkehit.
2. NSR lea dál bargamin dan ala ahte farggamusat čohkket nu oallugiid go vejolaš sis geat beroštit mearrasámi vuoigatvuođain oktasaš čoahkkimii. Mihttomearrin livčče buktit konkrehta jurdagiid ja plánaid mo viidáset galgat bargat sihkkarastit eallinvuođu vuonain. Lea dehálaš ahte nagoda čohkket nu viidát go vejolaš.
3. NSR lea juo iskamin vejolašvuođaid fievrridit ášši riikkaidgaskasaš dássái. Jus čájehuvvo ahte riikkadásis eai váldde vuhtii min ákkastallama, de mii háliidat leat gergosat geavahit riikkaidgaskasaš kanálaid sihkkarastit eallinvuođu mearrasámi riddo- ja vuotnaguovlluin.
Gulahallandieđut:
organisatuvrralaš nubbinjođiheaddji Gunn-Britt Retter, tlf. 913 59 222
Kommenter denne artikkelen
Tips en venn Gå tilbake