- NSR evttohii hálbbibu ealgabivddu go čálii gulaskuddancealkámuša FeFoii jagis 2008, stuorrafuođđobivddu birra. Ealgabivdu lea šaddan nu divrrasin ahte lea šaddan beanta dušše ruhtahearráid bivdu. NSR mielas galgá leat hálbbibu ealgabivdu, ja mii evttohit vuolidit biergogilo vuođđohatti, cealká Áilen-Nigá Máhtte, Mathis Nilsen Eira.
- Olbmuin lea álo leamaš vierru skáhppot biergguid čakčat, cealká Máhtte ja divrraša ealgabivddu. Jurddaš go šaddá máksit gaskal 10.000 – 15.000 kruvnnu bivddu ovddas – gal de diehttelasat šaddá menddo divrras dábálaš olbmui.
- Giliolbmot báhcet lummas gieđaid geahččat go rikkis hearrát bivdet ealggaid min guovlluin. Dát ii váldde lági, cealká Máhtte. Biergohatti ja bierggu vuođđohatti galggašii vuolidit, vai báikegotti ealgabivdit besset bivdit, ja eambbo olbmot beroštišgohtet ealgabivddus.
- Jos hatti vuolida, de eambbosat beroštišgohtet bivddus. Finnmárkkuopmodaga stivra berre geahčadit movt hatti sáhttá vuolidit. NSR gal áigu ovddidit ášši Finnmárkkuopmodaga stivrii go boahtte sámediggeáigodat álgá, lohpida Áilen-Nigá Máhtte, Mathis Nilsen Eira.
Kommenter denne artikkelen
Tips en venn Gå tilbake