Mii guoská Sámediggeráđi minerálalága gieđahallama, de oaivvildan ain ahte lea heajos politihkkálaš bargu maid Sámediggeráđđi lea dahkán.

Eai lean doarvái ráhkkanan

Unnimus maid sáhtášii vuordit dákkár nággobohccideaddji bargovuogis lea sihkarastit politihkkálaš doarjaga Sámedikki eanetlogus. Jus dalle livčče ovddidit evttohusa sierra njuolggadusaide lea eará ášši, muhto dalle livčče evttohus leamaš buoret ráhkkanuvvon, ja Sámedikki eanetlohku livčče dievasčoahkima dohkkehemiin oadjebasat sáhttán bealuštit dákkár mearrádusa. Dál viggá Sámediggeráđđi okto bealuštit sin njuolggadusaid, muhto lea čielggas ahte eai leat nágodan eai iežaset bellodatustibiid ge jáhkkihit ahte dá lea buorre bargovuohki.

Riggodagat maiddái sápmelaččaide buorrin

NSR oaivvilda ahte riggodagat mat gávdnojit Sámi guovlluin, ledjet dal eatnama alde vai vuolde, gáttis vai mearas, maiddá galget leat buorrin midjiide álbmogin. NSRas lea čielga oaidnu dasa ahte dat ođđa minerálaláhka ii leat doarvái buorre álbmotrievttálaš stándardaid ektui – ja mii šallosat sakka go Bargiidbellodat váljjii meannudit dán ášši, beroškeahttá Sámedikki oainnus. Sámediggepresideantta Egil Olli lea garrasit deattuhan vejolaš eamiálbmotbuhtadusa ja dat lea dagahan ahte olles ášši lea beare ruđaid birra. Muhto sámi iešmearrideapmi lea nu ollu eanet go dat. Mu áddejupmi lea leamaš ahte dat deháleammos Sámediggái minerálalága oktavuođas galggašii leat sihkarastit sámi váikkuhanfámu mineráladoaimmaide maiddá guovlluide mat leat Finnmárkku lulábealde.

Helga Pedersen hilgu iešmearrideami