Oalle imaš gullat Bargiidbellodaga njunnošiid Inga Lill Olsen, Karl Erik Schjøtt Pedersen ja Helga Pedersen falleheamen iežas bellodaga olbmuid Sámedikkis. Bargiidbellodaga sámediggejoavku sivva lea mahkáš ahte Ovddádusbellodat ovdána Finnmárkkus. Sii hállet duššiid ja gilvet heajos sámeságaid válgagiččus. Sii čuoččuhit duoid dáid, ákkaid haga ja duođaštusaid haga.
Sierranas vuoigatvuođat vai eai?
Gii lea nuppi gohčodeame rasistan? Makkár sierranas vuoigatvuođat leat sápmelaččain?
Sámedikkis lea gal lohpi cealkit vuostehágu soames áššiin mat sáhttet uhkidit sámi kultuvrra ávnnaslaš vuođu. Sámediggi ii sáhte duššiid dihte cealkit vuostehágu, dušše go lea dárbu. Ja Sámediggi gal ii láve ihcalassii cealkit vuostehágu.
Ráđđádallamat Ráđđehusain (konsultašuvnnat) leat mahkáš Sámedikki čiegus fápmokanála. Duohta lea ahte Sámediggi sáhttá váikkuhit áššiide. Ja hirbmat buorre go árrat sáhttá váikkuhišgoahtit ođđa lágaid. Muhto, eanas áššiin eiseválddit eai leat váldán vuhtii Sámedikki oainnu. Ráđđádallamat galggašedje leat rabas čoahkkimat ja mii galggašeimmet beassat diehtit daid birra ovddalgihtii. De beasašedje sámi organisašuvnnat ja bellodagat ságastallat láhkaáššiid birra ovdal go Sámediggi manná ráđđádallančoahkkimii.
Ođđa áiggit
Muittán mun oidnen Álttá ákšuvnna TVs mánnán. Lihkus mis ii leat dakkár áigi dál. Mis ferte leat Sámediggi. Sámediggi lea fárus hehttemin, ahte deike fas boahtá dakkár politihkka, man ulbmil lea jávkadit sámegiela, sámi kultuvrra ja sámi iešdovddu.
Silje Karine Muotka, NSR
Kommenter denne artikkelen
Tips en venn Gå tilbake