- Vuonnamárkanat lea moatti jagis nagodan šaddat geasuheaddji čakčamárkanin – gos plastihkka ii oba oidno ge. Báikkálaš duojárat ja eará buvttadeaddjit leat ožžon márkanastinvejolašvuođa gos eai dárbbaš gilvalit hálbbes gálvvuiguin mat guhkkin bohtet, ákkastallá Unjárgga sámediggeevttohas Gunn-Britt Retter.

Álbmotfeasta

Unjárgga gielda, Isak Saba guovddáš ja Várjjat Sámi Musea leat dahkan nana buori barggu ásahit dán márkana. Dan sii leat nákcen uhccán ruđaiguin.

- Vuonnamárkanat sáhttet šaddat álbmotfeastan ja erenoamáš dehálaš arenan duodjái ja eará báikkálaš gálvvuide, dadjá Gunn-Britt Retter.

Bb ii dorjon lasáhusa

- Bušeahttaevttohusas Sámedikkis skábmamánus 2008, evttoheimmet lasihit doarjaga Vuonnamárkaniidda 200 000 ruvnnuin. Dađi bahát eat ožžon dasa doarjaga go Bargiidbellodat ja sin ovttasbargoguoimmit jienastedje vuostá, muitala Retter. – Mearkkašanveara lea maid ahte báikkálaš sámediggeáirrasguovttos Magnhild Mathisen ja Knut Store maid jienasteigga dán vuostá.

Dán jagáš Vuonnamárkanat lágiduvvo Várjjat Sámi Musea olggobealde Vuonnabađas borgemánu 29.b. Dát leat árbevirolaš márkanat gos vuvdet dujiid, biktasiid ja eará luonddubuktagiid.