Lea ráhkaduvvon čielggadus Anárjoga álbmotmeahci vejolaš viiddideamis. NSR čujuha gulaskuddancealkámušas dasa ahte árbevirolaš sámi luonddugeavaheapmi ja riggodagaid ávkkástallan lea ceavzil.

- Jus áigot suodjalit, de fertet sihkkarastit sámi geavaheami. Dat mielddisbuktá maid mohtorjohtolaga, deattuha Keskitalo.

Finnmárkku fylkkamánni lea Birasgáhttendepartemeantta gohččuma mielde álgán guorahallat mo vejolaččat sáhttet viiddidit Anárjoga álbmotmeahci. NSR organisatuvrralaš nubbinjođiheaddji Gunn-Britt Retter dadjá ahte sámi geavaheapmi dego e.e. bivdu, guolásteapmi, murjen, murren ja boazodoallu leat guođđán luonddu nu ahte earáid mielas dál lea dan veara geavatkeahttá suodjalit boahtteáigái.  

Maiddái mohtorjohtolat

– Sámi geavaheapmi ii leat goassige áitán biologalaš máŋggabealatvuođa, nu mo lohket leat ulbmilin viiddideapmái, dadjá Retter. – NSR oainnu mielde lea ge sámi geavaheapmi man lea eanemus ávkkálaš suodjalit. Retter čuoččuha ahte árbevirolaš geavaheapmi soahpá bures innovašuvnnain, ja danin fertejit plánain maid leat mohtorfievrrogeavaheapmi.

Loga NSR gulaskuddancealkámuša dáppe.