Politihkka lea sierralágan bargu – ja lea ádjás bargu maidnu rievdadit. Badjelmeare áŋgiris politihkkár soaitá ribahit menddo ollu lohpidit ja seammá áššiid hállat maid buohkat ovdal leat gullan.
Eai leat álkkes čovdosat
Vaikko lohpida, de ii dáidde šaddat duohtan. Dávjá leat ollu hehttehusat: siskkáldasat bellodagas bealuštit ášši, válgaprográmmii čáhkkehit ášši, eará politihkalaš guimmiin nákkáhallat ja šiehtadallat ášši, ruhta galggašii gávdnot ja de galggašii duohtan dahkkot. Válgalohpádusat dáidet heavvanit ja jávkat. Ii leat imašge ahte jienasteaddjit dolket ja heitet luohttimis politihkkáriidda.
Lohpida viššalisvuođa ja gulahallama
Maid son mun galggašin lohpidit jienasteddjiide Davvi válgabiires? Lohpidan goit viššalit bargat, gulahallat válgabiire jienasteddjiiguin ja rabas čalmmiid politihkket. Dan mađe lohpádusa gal sáhtán doallat, danne go dat lea mu iežan duohken, mun gii háliidan áššiid oažžut áigái politihkalaš barggu bokte.
Davvi válgabiire NSR-listu lea ráhkadan ovcci ášši Sámediggái:
1. Geavahit ja seailluhit sámegiela. NSR áigu nannet skuvlla sámegieloahpahusa.
2. Hábmet fálaldagaid min mánáide, nu go earáge mánáide. NSR áigu bargat vai buot sámi mánát ožžot sámi mánáidgárdesaji.
3. Sámi kultuvra ja sámi sisdoalu galgá fárrui kulturskuvllaide ja skuvlla astoáiggefálaldahkii.
4. Dárbbašit buoret vuođu man duohken mearridit. NSR áigu 420 Kw el-fápmorustega Báhccavuonas Hámmarfestii buoret guorahallat ja heivehit birrasii, go lea dála áiggi stuorimus luonddusisabáhkken.
5. Nanus mearrasámi boahtteáigi. NSR áigu ahte riddoguolástuslávdegotti árvalus šattašii duohtan.
6. Guolásteaddjit galget birget. NSR áigu njurjuid logu unnidit.
7. Ođđa sámi ealáhusaide áigu NSR asahit sámi innovašuvdnafoandda.
8. Ruohttasiidda fal oahpásmuvvat, danne áigu NSR dokumenteret ja muitalit sámi historjjá.
9. Manne min bidjet olggobeallái? NSR mielas galgá Álttá maid sámi giellahálddašanguvlui!
NSR lea 40 jagi ožžon áigái ollu áššiid sámiid ovddas. Mii lea gergosat joatkit barggumet sámi servodahkii ja sámi álbmogii buorrin. Go fal jienasteaddjit min dorjot, de mii joatkit barggumet.
Jienast NSR sámediggeválggas!
Kommenter denne artikkelen
Tips en venn Gå tilbake