RSS-feed

Velg språk!

Utskriftsvennlig versjon Ođđa guolástuspolitihkka lea duvdiluvvon skuffii
Geir Tommy Pedersen mielas ii leat Bargiidbellodat nákcen vuojehit sámi vuoigatvuođaid guolásteapmái - eai Sámedikkis eai ge Ráđđehusas.
- Sámedikkis livčče lean olu bargu sámi guolástanáššiid ektui. Lihkká lea jaskat. Manin? Lea go nu ahte BB Sámedikkis viggá suodjalit iežaset bellodatustiba ja guolástusministara Helga Pedersena, jearrá Geir Tommy Pedersen. Son lea NSR gulahallanolmmoš guolástusáššiin.

Almmuhuvvon: 23.07.2009

Riddoálbmogis lea dál historjjálaš vejolašvuohta njulget dološ boasttuvuođaid, sihke Riddoguolástanlávdegotti ja Sámeriektelávdegotti bokte. Sámeriektelávdegoddi almmuhii iežas árvalusa juo jagis 2007, ja Riddoguolástanlávdegoddi ges almmuhii iežaset bargguid Deanus 18.02.09. Sámediggi dagai mearrádusa áššis miessemánus 2008 ja gulaskuddanáigi nogai juovlamanus 2008. Manin dasto ii dáhpáhuva mihkkege Sámedikki bealis gos BB dál lea njunnošis?

Čielggadeamit duvdiluvvon Helga skuffii

Dan áigge go Norgga Sámiid Riikkasearvi (NSR) jođihii Sámedikki, hoahpuhii Sámediggi čađat Riddo- ja guolástandepartemeantta sámi guolástanvuoigatvuođaid ektui. – go ledje opposišuvnnas, láittii BB NSRa garra sániiguin ja oaivvildedje ahte fertii ovddidit mearrasámi vuoigatvuođagáibádusaid riikkaidgaskasaš orgánaide.

Mii dál dáhpáhuvvá? Gos lea Sámediggi? Eai go BB Sámedikkis áiggo stevdnet iežaset guolástusministara go son han lea duvdilan buot sámi guolástanvuoigatvuođaid iežas skuffii. Dán skuffas leat maid ovddeš sámi guolástanvuoigatvuođa čielggadeamit, cuiggoda Geir Tommy Pedersen (NSR).

Mii dárbbašat ođđa guolástanpolitihka – DÁL!

- Olu sámi guolásteddjiin lea dál heahtedilli. Eanet ahte eanet riddo- ja vuotnabivdit masset eallinláibiset earret eará kvohtaidvuovdima geažil, go ii leat šat mearri man guhkit riddofatnasat sáhttet leat, turistabivdu stivrejumi haga, riddodorski rukseslisttus ja nu ain viidáset. Čielggademiid ferte viežžat eret skuffas ja ođđa guolástanpolitihkka ferte hábmejuvvot – dál, gáibida NSR gulahallanolmmoš guolástanáššiin Geir Tommy Pedersen.

Olu áššit čoavddekeahttá

- Sámedikkis lea olu bargu báhccán mii guoská sámi guolástanáššiide. Dán sámediggeáigodagas mii nammadeimmet Riddoguolástanlávdegotti, ja sii leat buktán iežaset árvalusa. Dán ferte čuovvolit – ja mus leat erenoamážit vuordámušat vejolaš čovdosiidda mat leat geográfalaččat viidát go dušše Finnmárku-riddu, cealká Geir Tommy Pedersen. – Muhto maiddái eará áššit leat čoavddekeahttá, nu mo LD evttohus ásahit konsešuvdnaortnega mearraluosabivddus. Dan NSR garrasit vuosttilda.

Guolásteapmi lea vuođđun ássamii rittus

- NSR lea 40 jagi čađa áŋgiruššan sámi vuoigatvuođaid ovddas guolásteapmái: Easkka maŋimuš jagiid leat olbmot miehtagoahtán NSR ákkaide. Riddoguolástanlávdegoddi lea okta ovdamearka. Dál fertet das ávkkástallat ovdal go biekkat fas jorggihit, ávžžuha Pedersen. – Guolásteapmi lea stuorra ealáhus dáppe davvin, ja dehálaš ássamii sámi gilážiin rittus. Muhto maiddái ođđa ealáhusat áitet guolásteami, nu mo guollebiebman ja oljobohkamat. Dát buktá ođđa hástalusaid, no mo ovdamearkka dihtii seismihkka-báhččin.

 

Geir Tommy Pedersen (43), lea NSR gulahallanolmmoš guolástusáššiin 2009 sámediggeválggaid oktavuođas. Geir Tommy lea maid njunoševttohas NSR listtus Gáiseguovllu válgabiires. Son lea hárjánan sámepolitihkkár, ja lea álo beroštan ealáhuspolitihkas – ja erenoamážit guolástuspolitihkas. Son ássá dál Tromssas, muhto lea Gáivuonas eret.

Dáppe sáhtat lohkat eanet Geir Tommy Pedersena ja NSR listtu birra Gáiseguovllu válgabiires.





Kommenter denne artikkelen    Tips en venn  Gå tilbake
NSR medias
Evttoha ásahit priváhtaskuvllaid
Presideanta lea vuollánan
NSR ovddida otne eahpeluohttamuša
NSR ii arvan árvalit eahppeluohttámuša...
Olli ferte čilget oaiviliiddis

 

Maŋimuš kommentárat artihkkalaiidda

NSRs historie
  • Bokep Online Fardad
  • På tide å oppdatere?
Berrejit ásahit studeantastipeandda
  • 55nl
Duhtavaš go sámegielstipeanda lea lassánan
  • cuhRbaCCgbGvKR
  • Tøffa govva!

Norgga Sámiid Riikkasearvi
Norske Samers Riksforbund

Poastboksa 173 - 9521 GUOVDAGEAIDNU
Tlf.: +47 78 48 69 55  * Fax: +47 78 48 69 88 *
nsr(a)nsr.no
Mobil: +47 988 50 273 - Org.nr: 971 481 463

Hápmen: Samipress Medietjenester
Siidovuogádat:
Interkodex A/S