Nu sii leat ge organisašuvnna Norgga Sámiid Riikkasearvvi (NSR) válljen váldo vašálažžan. Sudno cealkámušat hui čielgasit čájeha daid stuorra erohusaid dáčča bellodagaid stuorra, lossa válgagižžoapparáhtain ja sámi organisašuvnnaid vátna resurssain. Sámi organisašuvnnaid bušeahtta lea dušše lubmaruska dáčča bellodagaid dievva ruhtaburssaid ektui. Ovdamearkka dihtii oažžu Bb sullii 100 milliuvnna jahkásaččat jođihit bellodaga.
Sámedikki rolla eamiálbmotjietnan
Sámediggi ásahuvvui deavdindihti demokráhtalaš váilivuođa, rolla maid eará bellodatpolitihkalaš orgánat eai nákcen deavdit. Sámediggi galggai guoddit eamiálbmotjiena dáčča demokratiijas. Jus Sámediggi galggaš nákcet deavdit rolla eamiálbmotparlameantan, ii ge gártat mini-fylkkasuohkanin, de fertejit sámi organisašuvnnat ja bellodagat leat Sámedikkis.
Mearrádusaid dahket kámmáris
NSR ovttasbarggai Bondevik II-ráđđehusain ja oččodii konsultašuvdnaortnega gaskal Sámedikki ja Ráđđehusa. Dát šiehtadus ii leat ovdánan nu mo berrešii, e.e. danin go sii geat oasálastet konsultašuvnnain dál bohtet seamma bellodagas. Lea baggu divvut gažaldaga man duohta konsultašuvnnat leat go seamma bellodat lea guktui bealde šiehtadallanbeavddi. Dál orru leamen nu ahte stuorra dehálaš sámi áššiid mearridit Bb`a kámmáris lohkkauvssa duohken. Dát dilli dagaha mu oainnu mielde sámi demokratiija ovdii.
NSR leamašan mielde huksemin servodaga!
Ørnebakk čuoččuha NSR lea suova siste. Gal dát ii doala deaivása. NSR lea 40 jagi čađa leamašan mielde huksemin sámi servodaga vuođu rájes. NSR lea ásahan mánáidgárddiid ja rahčan addit sámi mánáide ja nuoraide sámi skuvlafálaldaga. NSR lea ásahan sámi ásahusaid, festiválaid ja giellaguovddážiid. NSR lea álggahan áviissaid, lágádusaid ja teáhtera. NSR lei guovddážis oččodeamen Sámedikki.
Manin leat vuoigatvuođat nu dehálaččat?
Ørnebakk čuoččuha ahte sámi jienasteaddjit eai beroš vuoigatvuođain. Dasto son rábmo juoga maid son vissa oaivvilda Bb lea olahan Sámedikkis, nammalassii sámi skuvlaluohká ásaheami Álttás. Ironiija dás lea ahte sámi luohká Álttás ii livčče goassige gártan jus sámi mánáid vuoigatvuođat eai livčče nannejuvvon Oahpahuslágas. Suohkanis ii livčče muđuid dáhttu. Váhnemat fertejedje lága beaškalit beavdái ovdal go ožžo miela mielde. Ain lea nu ahte sámi váhnemat ja sámiid Searvvit fertejit rahčat sihkarastit sámi mánáidgárdefálaldaga ja sámi skuvlafálaldaga min mánáide.
Čavčča Sámediggeválga lea dehálaš válggat, dat lea árvvuid birra válga. Sámepolitihkka lea luoddaerrui ollen, ja sámi jienasteaddjit fertejit dieđihit guđe guvlui sii háliidit ahte Sámediggi galgá mannat. Bb`a bellodat ja ruhtafápmu lea dagaheamen Sámedikki vuolitossodahkan Bargiidbellodagas, stivrejuvvon Youngstorget bellodatkantuvrras. NSR háliida ahte Sámediggi ain galgá bissut sápmelaččaid álbmotválljejuvvon jietnan. Jus jienastat NSR de sihkkarasttát ahte Aili Keskitalo šaddá Sámedikki presideantan. Bb sáhttá almmáštallat – muhto go smávit leat soját, de ii girdde menddo allagassii.
Kommenter denne artikkelen
Tips en venn Gå tilbake