- Mun hástalan kulturministara sihkkarastit sámi ovddasteami mediakommišuvnnas. Seammás lea ain dárbu muittuhit Ráđđehusa man dehálaš lea vuhtii váldit daid erenoamáš hástalusaid mat leat čatnon sámegillii. Dán mun sávan sii atnet muittus go mediakommišuvdna doaibma galgá mearriduvvot, cealká NSR jođiheaddji Aili Keskitalo.
Preassadoarjja dehálat sámi mediaide go earáide
Álgoálbmogin ja minoritehtan lea sápmelaččain Norggas vuoigatvuohta oažžut heivehuvvon mediafálaldaga. Sámi mediat leat eaktun ealli servodatdigaštallamii. Eai leat nu olu diŋgojeaddjit ja annonssaoastit, ja danin lea preassadoarjjaortnet vel dehálat sámi mediai go earáide. NSR oaivvilda dát bealit fertejit vuhtiiváldot go mediakommišuvdna nammaduvvo ja sin doaibma mearriduvvo.
Sálas livčče lunddolaš
- Mu mielas livčče lunddolaš ahte Sámi áviisa- ja lágádussearvi Sálas ovddastivčče sámi beliid dán kommišuvnnas. Sálas dieđášii buoremusat makkár olbmuin lea rivttes gelbbolašvuohta ja hárjáneapmi sihkkarastit ahte maiddái sámi bealit vuhtiiváldojit go boahtteáiggis rievdadit preassadoarjjaortnega, dadjá Keskitalo.
Kulturdepartemeanta lea almmuhan ahte sii áigot nammadit kommišuvnna mii galgá geahčadit preassadoarjjaortnega maŋŋá strukturrievdademiid medias, ja momsageahpedeami medias.
Kommenter denne artikkelen
Tips en venn Gå tilbake