Norgga Sámiid Riikkasearvi (NSR) reagere garrasit dasa go BB lea geavahan mealgat badjel golbma miljon ruvnnu Sámedikki ruđain oastit boares girjjiid. Dát mielahis stajideapmi mielddisbuktá ahte olu ođđa buori oahpponeavvut eai goassige ilmma.
Juohke viđát ođđa oahppogirji maid sámi mánát ledje boahtte jagi galgat oažžut, eai oaččo danin go BB lea oasttán boares girjjiid vuorkkáin. Dán rehkenastá go geahččá oahpponeavvu bušeahttaloguid obalohkái (ru 11 875 000) ja dan supmi maid leat geavahan boares girjjiid oastimii (ru 3 000 000).
Oahppogirjeprošeavttaid vuordináigi stuorru
- Máksá máŋggaid milliuvnnaid oastit boares oahpponeavvuid, ja dat dieđusge boahtá masa nu čuohcat. Mii diehttit ahte olu oahppogirjeprošeavttat leat vuordimin, muhto unnán ruđa dihtii dat šaddet vel ain guhkkit vuordit ruhtadeami, dadjá presideantaevttohas Aili Keskitalo (NSR).
Šadde hilgut 47% oahpponeavvuin
Ja vel heiveha BB čuoččuhit ahte buot oahpponeavvoprošeavttat leat ruhtaduvvon, ja ahte sin politihkka ii váikkut ođđa oahpponeavvuid buvttadeapmái. – Dát lea gielis, vástida Aili Keskitalo, ja čujuha dasa ahte go Sámedikki doarjjastivra juolludii ruđaid oahpponeavvuide, de šadde hilgut 47% ohcamušain. Prošeavttat leat olles látna vuordimin.
NSR váldá oahpaheddjiid ja rektoriid duođas
NSR lea čađat doalahan ahte jus Sámediggi galgá nuvttá juohkit oahpponeavvuid suohkaniidda, de dat ii galgga čuohcat ođđa oahpponeavvuid buvttadeapmái. Nu mii leat ge ovttaoaivilis eanaš sámi oahpaheddjiiguin ja rektoriiguin, geat maid leat váruhan oastimis dáid boares girjjiid.
- Go mii dál oaidnit ahte dát lea mannamin endorii, de lea min ovddasvástádus dieđihit, deattuha Keskitalo.
Sámedikki ruhtabursa guorrana – suohkanat ožžot eambbo
Bb lea stuorra sániiguin lohpidan nuvttá oahpponeavvuid. go eai nákce buvttadit ođđa, de ostet baicce boares. – Ortnet goarida Sámedikki ruhtaburssa. Mun eahpidan ahte ruđat maid suohkanat dál sestet bohtet sámi ohppiide buorrin. Dát boares oahppogirjeskeaŋka ii buorit sámi mánáid árgabeaivvi skuvllas. Dat dušše addá muhtin Bb-sátnejođiheddjiide veahá buoret ruhtadili, cuiggoda Keskitalo.
Kommenter denne artikkelen
Tips en venn Gå tilbake