Norgga Sámiid Riikkasearvi (NSR) oaivvilda leat dárbu eanet sámi ofelaččaide Norggas, ja dáhttut ahte boahtte jagi rájes nammaduvvojit duppal geardde eanet (6) sámi ofelaččat. Dan oktavuođas berre maid veardidit guhkidit ofelaš-áigodaga, nu ahte vel buorebut sáhttá ávkkástallat dan gelbbolašvuođas mii dáid ofelaččain lea. Guhkkit áigge badjel berre ortnet viiddiduvvot vel eanet. Earret eará livčče lunddolaš jurddašit riikkarájiid rastá, nu ahte dát buorre prošeakta boađášii ávkin maiddái eará riikkaide gos sápmelaččat ásset.
Fertejit olahit eambbosiid
Sámi ofelaččat mátkkoštit joatkkaskuvllaid mielde, ja vásihit ahte olugat jearahit sin dieđuid ja gelbbolašvuođa. Dađi bahát sii olahit dušše oasáža riikka skuvllaohppiin. Seammás diehttit ahte lea stuorra dárbu eanet dieđuide sápmelaččaid ja sámi kultuvrra birra. Sámi ofelaččat hehttejit ovdagáttuid ja danin Norgga Sámiid Riikkasearvi oaivvilda ahte berre olahit eambbosiid.
Sámi ofelaččat lea ortnet maid dalá Gieldda- ja regionálaministtar Erna Solberg álggahii jagis 2004.
Kommenter denne artikkelen
Tips en venn Gå tilbake