Sámedikki doarjjastivra čoahkkimis Divttasvuonas 22.- 23.06.09 juolluduvvui oktiibuot 4 298 000 ruvnno ealáhusdoaimmaide ja 2 000 000 ruvnno árbedieđu duođašteapmái ja gaskkusteapmái.
Olu ohcamušat
Oktiibuot juolluduvvui árvoháhkanprográmmas 1 298 000 ruvnno lotnolasealáhusaide ja sámi mátkkoštusealáhusaide. Ja doarjjastivrra jođiheaddji Ann-Mari Thomassen (NSR) muitala ahte dát leat bivnnuhis ruđat, go ledje boahtán olu ohcamat. Doarjjastivra beasai ge dál doarjut olu buriid prošeavttaid.
Láibbohat ja sámi ássansadji
- Earret eará juolludeimmet 300 000 ruvnno doarjaga Ránáidsullo vásáhusaide (Tranøy opplevelser) ásahit geađgemuorraomman láibbohaga oktan láibbohatgáffádagain Hápmir suohkanis. Sáttiidvuomi márkanovddidanfitnodat (Sandmark Bygdeutviklingsselskap) oaččui ges 205 000 ruvdnosaš doarjaga márkosámi ássansaji Vilgesváre ovdánahttima oktavuođas, muitala Thomassen.
Meahcástanstipeanda ja guollefatnasat
Maiddái ovdánahttinprošeavttat bálvalan- ja smávvaindustriijas ožžo ruđaid. - Attiimet álggahanstipeanddat oktiibuot 583 000 ruvnno ovddas olbmuide geat áigot álggahit meahcceealáhusdoaimmaid, smávitlágan biebmobuvttademiid ja duodjedoaimmaid. Lassin juolluduvvui 531 000 ruvnno doarjja eanandoalu doaibmavisttiide ja 570 000 ruvnno guolástusfatnasiid oastimii, čilge Thomassen.
Náhkeáimmahuššan ja riegádahttin
Sámeálbmotfoanddas juolluduvvui 2 000 000 ruvnno doarjja árbedieđu duođašteapmái ja gaskkusteapmái.
Doarjjastivrra jođiheaddji Ann- Mari Thomassen (NSR) lea earenoamáš duhtavaš go adde 300 000 ruvdnosaš doarjaga Riddo Duottar Museai, Kárášjogas, gos áigot čohkket ja duođaštit náhki ja tekstiila árbevirolaš doalahan- ja áimmahuššanvugiid. Maiddái 104 000 ruvdnosaš doarjja Røyrvik suohkanii gos áigot duođaštit sámi árbevieruid áhpehisvuođa ja riegádahttima birra, lea Thomassen mielas dehálaš.
Kommenter denne artikkelen
Tips en venn Gå tilbake