Bargiidbellodaga sámediggejoavkku parlamentáralaš jođiheaddji, Willy Ørnebakk, falleha lohkkiidčállosis NSRa go áigut vuoruhit sámegiela. Ørnebakk oaivvilda ahte dasa ii leat dárbu ja čujuha ráđđehusa diimmáš St.dieđáhussii nr. 28 (2007-2008) Sámepolitihkka, ja aiddo almmuhuvvon “Sámegiela doaibmaplánii”. Bargiidbellodat orru de oaivvildeamen ahte lea dušši sámediggepolitihkkáriidda geavahit návccaid sámegillii maŋŋá go stuorradiggedieđáhus ja doaibmaplána leat ráhkaduvvon. NSR oaivvilda ges áibbas eará.
Sámegielas lea hoahppu
Sámi servodagas leat olu ja váttes čuolmmat čadnon min gillii. Sámi mánáin ii leat oktagaslaš vuoigatvuohta oažžut oahpahusa sámegielas ja sámegillii. Máhttolokten ii leat heivehuvvon guovlluide gos sámegiella lea unnitlogus. Oahpaheaddjit, oahppit ja váhnemat heađástuvvet go gealbomihtut ja diibmomearri eai soaba oktii. Váhnemiin váilot giellamáhttu ruovttus veahkehit mánáid bihtáiguin. Go vel suohkaniin siskkobealde sámi hálddašanguovllu ge eai nákce oččodit sámegieloahpaheddjiid geain lea pedagogalaš oahppu. Olu sajiin njiedjá sámegielhálliid lohku jagis jahkái ja giella soaitá oalát jávkat. Dalle fertejit ge sámepolitihkkárat ražastit, ja dainna lea hoahppu!
Doaibmaplána fillen Bargiidbellodaga
Orru leamen nu ahte ráđđehusa sámegiela doaibmaplána lea fillen Bargiidbellodaga jáhkkit ahte dál ii leat šat dárbu maidege dahkat. Lea hirpmástuhtti go guovddáš sámepolitihkkáriin lea dakkár oaidnu, ja lea ge dárbu buktit várrehusa! Ørnebakka čálus čielgasit čájeha ahte Bargiidbellodat ii leat ipmirdan man stuorra giellahástalusat sámi servodagas duođaid leat.
Olu bargu ain
Sápmelaččat vásihit beaivválaččat ahte lea stuorra erohus das mii báhpiriin čuožžu ja dat mii lea duohta dilli. NSRii lea dehálaš deattuhit dan mii duohta máilmmis dáhpáhuvvá. Doaibmaplánas leat olu doaimmat namuhuvvon mat sáhttet nannet sámegiela ieš guđet surggiin, muhto mun váruhan olbmuid doaivumis ahte dál sámi álbmotválljejuvvon politihkkárat sáhttet dušše mievžžahit stullui ja jáhkkit ahte bargu lea dáhkkun.
NSR joatká sámegiela vuoruhemiin
NSR áigu čuovvovaš sámediggeáigodagas čielgasit joatkit sámegiela vuoruheami. Doaivumis dát lea mielde gádjumin sámegielaid. Mii oaidnit ahte giella muđuid sáhttá jávkat. Ráđđehusa sámegielaid doaibmaplána lea unna lávkkáš rivttes guvlui. Dat lea buorre. Dalle NSR čohkkesta fámuid ja joatká barggu. Mis lea ain guhkes geaidnu guorrat.
Kommenter denne artikkelen
Tips en venn Gå tilbake