Nu oččošedje 14 mánát fálaldaga geat vurdet sámi mánáidgárdesaji. – Dát mearkkaša ahte buot sámi mánát Álttás geat dan dáhttot ožžot sámi mánáidgárdefálaldaga čavčča rájes – ja dat lea máilmmi buorre dadjá Muotka duhtavaččat. Lea NRK Sámi Radio gii buktá dáid ilolaš dieđuid.
Ávki rahčamušain
- Álggos ferten rámidit sámi váhnenfierpmádaga geat leat olu searaid ja návccaid bidjan dán áššái dadjá Muotka guhte diehtá ahte váhnenfierpmádat lea garrasit bargan suohkana ektui lasihit sámi mánáidgárdesajiid Álttás. – Dát lea ovdamearkan dasa ahte lea ávki go mis lea oktasaš váhnenorganisašuvdna bellodatrájáid rastá mii bargá dáid áššiiguin, oaivvilda Muotka.
Álttá suohkan váldá ovddasvástádusa
- Mun lean maid hui ilus go Álttá suohkan dál váldá ovddasvástádusa sihkkarastit eanet sámi mánáidgárdesajiid. Mii leat guhkit áigge diehttán ahte lea dárbu eanet sajiide, nu ahte dál lei duohta áigi heivehit kommunála mánáidgárdefálaldaga duohta dárbbuide, deattuha Muotka.
Buot mánain galggašii leat vuoigatvuohta
- NSR oaivvilda ahte buot sámi mánáin berrešii leat oktagaslaš vuoigatvuohta sámi mánáidgárdefálaldahkii, ja bargá danin dan ala ahte dán oččodit čielgasit njuolggadusaid ja lágaide mielde, čilge Muotka.
– Lea midjiide buohkaide buorre ahte Álttás dál šaddet sámi mánáidgárdefálaldagat buohkaide, ja dat čájeha ahte mii sáhttit čoavdit áššiid gulahallama ja ovttasbarggu bokte- ja dat lea buorre mearkan boahtteáigái, loahpaha Muotka.
Kommenter denne artikkelen
Tips en venn Gå tilbake