- Mun lean hui duhtavaš go mii Sámedikki doarjjastivrras leat sáhttán doarjut dán guokte dehálaš gielladoaimmaid mu iežan ruovttuguovllus. Guktot doaimmat leaba mánáid ja nuoraid várás, sin várás geat boahtteáiggis galget iežaset mánáide oahpahit sámegiela ja geat galget sihkkarastit ahte giella ain eallá guovllus gos dat juo lea rašši, dadjá Sámedikki doarjjastivrra jođiheaddji Ann-Mari Thomassen (NSR).
Giellabeassi Árranis
Árran julevsámi guovddáš Divttasvuonas oažžu ruđaid Sámedikki doarjjastivrras lágidit giellabeasi julevsámegielhálli nuoraide 16 jagi rájes. Sii galget šaddá sihke čeahpit sámástit ja maiddái oažžut vejolašvuođa eambbo oktavuođain geavahit gielaset. Dát galgá leat fálaldat mii nuoraid mielas lea somá, doppe galget leat doaimmat mat leat heivehuvvon nuoraide. Dehálaš bealli lea maid ahte maiddái julevsámi nuorat Ruoŧa bealde besset dasa searvat.
Leairaskuvla Várdobáikkis
Várdobáiki sámi guovddáš Evenášis ožžot ruđaid Sámedikki doarjjastivrras hábmet modealla mo sáhttá čađahit giellalávguma leairaskuvlla bokte. Dát galgá leat fálaldat ohppiide geain lea sámegiella juogo vuođđo- dahje joatkkaskuvllas. Ulbmil lea oččodit eambbosiid váldit sámegiela atnui, ja doppe galget leat doaimmat mat ovdamearkka dihtii leat čadnon duodjái, sámegillii, meahcásteapmái ja málesteapmái. Plána mielde vuosttaš leairaskuvla fállojuvvo 2010 giđa.
Kommenter denne artikkelen
Tips en venn Gå tilbake