– Eanet ahte eanet suohkanat leat mearridan ahte sii háliidit searvat sámegiela hálddašanguvlui. Dát leamašan maid fáddá maid Álttá Sámiid Searvi máŋgii lea ovddidan suohkanii, ja Sámediggi lea maid oasálasttán dáid čoahkkimiin muitala Skum gii maid leamašan searvvi jođiheaddjin moanat jagiid.
– Mu mielas lea áigi fas loktet dán ášši, dadjá Skum, ja muitala ahte sámediggeráđis galgá leat čoahkkin Álttá suohkaniin 19. b. miessemánus sámegieloahpahusa birra.
Livčče buorre sihke sápmelaččaide - ja suohkanii
- Jus searvvašii giellahálddašanguvlui, de buorránivčče fálaldagat sápmelaččaide guovllus. Mii han diehttit ahte Áltá fállá sámegieloahpahusa odne. Muhto váilot sámi mánáidgárdesajit Álttás, juoga mii lea váttisvuohtan jahkásaččat. Dát čájeha dan stuorra dárbbu vuoruhit sámegiela Álttás, dadjá Brita Julianne Skum.
- Jus suohkan searvvašii sámi giellahálddašanguvlui, de dat maid mearkkaša ahte oažžu eambbo ruđaid buoridit fálaldagaid sámi ássiide, muittuha Skum.
Áltá berre čuovvut Loabága
Ovdalaččas leat dát suohkanat searvan giellahálddašanguvlui: Guovdageaidnu, Kárášjohka, Deatnu, Unjárga, Porsáŋgu, Gáivuotna, Divttasvuotna ja Snoasa. Mannan vahkos lea maid ráđđehus dieđihan ahte maiddái Loabát suohkan Romssa fylkkas beassá searvat.