Čoahkkimis gaskal Sámedikki plána- ja finánsalávdegotti ja SÁLAS`a, bođii ovdan ahte Sámedikki ortnet nuvttá oahpponeavvuiguin dagaha ahte sámi lágádusat ožžot mealgat heajut máksot go sullasaš dáža lágádusat. Dát ii leat dohkálaš, oaivvilda Norgga Sámiid Riikkasearvi (NSR).
Fertejit lágádusaide buorit eavttut
- Mii leat guhkitáigge ballan ahte Sámediggeráđđi lea menddo heajos ovdabarggu dahkan nuvttá oahpponeavvo ortnegiin. Go mii dál gullat ahte sámi lágádusat ožžot heajut eavttuid go dáža lágádusaid geat barget unnitlogugielaiguin, de fertet mii reageret, cealká sámediggeáirras Gunn-Britt Retter (NSR).
Ballat ahte ođđa oahpponeavvut maŋŋonit
NSR ballá ahte ođđa oahpponeavvoprošeavttat sáhttet maŋŋonit go Sámediggeráđđi ii leat nákcen boahtit ovttaoaivilvuhtii lágádusaiguin makkár eavttut galget ođđa oahpponeavvoprošeavttain.
1.000.000 ruvnnu lasi
- Danin NSR čuovvola iežamet evttohusa čavčča bušeahttagieđahallamis, ja mii evttohat lasihit oahpponeavvoprodukšuvnna 1 milliuvnna ruvnnuin. Dáinna mii doaivut gokčat juobe oasi ge daid lassigoluin maid nuvttá oahpponeavvut mielddisbuktet, ja mainna sámediggeráđđi ii leat bušeteren, dadjá Retter.
Váldit ovddasvástádusa
NSR lea čađat dadjan ahte ortnet nuvttá oahpponeavvuiguin ii galgga ođđa oahpponeavvuid ráhkadeami ovdii boahtit. Dál fertet mii váldit ovddasvástádusa vuoi nu ii geava, loahpaha Gunn-Britt Retter.
Kommenter denne artikkelen
Tips en venn Gå tilbake