Mun háliidivččen galledit Njeareveaji - ja áinnas háliidivččen dohko vuoddjit biillain. Ođđaáigásaš servodagas eatnašat mis galledat nuppi nuppi biillain. Go joavddan Njeareveadjái, de mun sihkkarit deaivvan gievra ealli servodaga gos ásset olbmot geat čevllohallet sámi kultuvrra dihtii ja geain lea nana gullevašvuohta iežaset gillái. Doppe lea vuotna duháhiid jagiid mielde buktán eallinláibbi olbmuide ja leamašan dehálaš oassin báikkálaš kultuvrras ja gielas. Sulasta máŋgga dáfus iežan ruovttubáikki – Suovvejoga. Munnje lea dát sámi kultuvra. Ii fal mearrasámi, ii ge boazosámi, ii márkosámi dahje gávpotsámi – muhto sámi.
De lea dat geaidnoášši. Lea áibbas čielggas – mu oainnu mielde ferte Njeareveadjái huksejuvvot guhkká plánejuvvon geaidnu. Juohke servodat mii ieš dan dáhttu, berre oažžut dohkálaš infrastruktuvrra, nu go geaidnu Njeareveadjái. Ná duhtada álbmoga dárbbuid ja nanne báikki ealáhusaid. Searaid maid báikeolbmot leat bidjan geaidnoáššái lea rápmonveara. Muhto ovddasvástádus hukset almmolaš geainnu ii sáhte biddjot priváhtaolbmuid olggiid ala. Eiseválddit eai sáhte diktit ássiid ieža guoddit dán ovddasvástádusa. Dál lea buhtadusgáibádus ge čadnojuvvon Njeareveaji geidnui. Eai báikeolbmot galgga dárbbašit dán ge noađi guoddit. NSR oaivvilda ahte eiseválddit fertejit váldit ovddasvástádusa dán erenoamáš áššis.
Solfrid Pettersen čuoččuha lohkkiidreivvestis Finnmarkenis 27.04.09 ahte NSR lea čájehan unnán beroštumi mearrasámi vuoigatvuođaide. Go Norgga Sámiid Riikkasearvi (NSR) 40 jagi čađa lea ovddidan sámi beroštumi ja vuoigatvuođaid, de leamašan sáhka BUOT sámiid kollektiiva vuoigatvuođain – ovtta – álbmogiin. Dán čájehit earret eará NSRa Riikkačoahkkincealkámušat 1968 rájes otná beaivái. Cealkámušat maid NSR lea čuovvolan árgabeaipolitihkas. Go lihkká sáhttit sihke oaidnit ja dovdat ahte sámi beroštumit riddo- ja vuotnaguovlluin gillájit, de oaivvildan ahte ii sáhte NSRa ja Sámedikki sivahit.
Čielga ovdamearka lea Stuoradiggedieđáhus 8 (2005-2006) Barentsa ábi Hálddašanplána. Sámediggi NSR stivrejumi áigge cuiggodii ahte sámi beroštumit fertejedje vuhtiiváldot maiddái doppe. Muhto Stuorradiggedieđáhusas bidjet baicce návccaid duššindahkat sámi beroštumiid rittus ja čállet ná sámi geatnegasvuođaid birra:
”På bakgrunn av nasjonale forpliktelser etter Grunnloven og folkerettens regler om urbefolkninger og minoriteter er Staten forpliktet til å ivareta grunnlaget for reindriften. Reindriften er svært arealkrevende på grunn av marginale beiteområder og på grunn av reinens behov for ulike sesongbeiter og flytteveier mellom dem. Arealmessige vurderinger på land omfattes ikke av denne meldingen, jf. kapittel 2.4.”