Sámedikki doarjjastivrra čoahkkimis 21.04.09 juolluduvvui oktiibuot 520 000 ru guovtti sierra fitnodatásaheapmái main nuorat leat mielde.

- Nuorat lea dakkár joavku geain lea unnán iežas kapitála ja fuones vejolašvuohta oažžut báŋkoloana. Danne illudahttá go Sámediggi sáhttá addit doarjaga nuoraide vai besset duohtan dahkat iežaset ásahanplánaid, cealká Ann-Mari Thomassen (NSR).

Nuppi áššis addojuvvui doarjja 280 000 ru buokčalanfitnodaga ásaheapmái Divttasvuona suohkanis. Dáid ásahemiid duogábealde leat guhtta nuora geat leat gaskal 19 ja 27 jagi, geat leat oaidnán vejolašvuođa ásahit fitnodaga mii fállá bálvalusaid guollebiebmansuorgái.

Nuppi eará áššis lea ásahuvvon bearašfitnodat mii galgá bargat vásihusvuđot turismmain Mázes Guovdageainnu suohkanis. Fitnodaga beaivválaš jođiheaddji lea nissonolmmoš gii lea badjelaš 20 jagi boaris ja háliidivččii oažžut boahtteáiggi gilis.

Nuorat leat dakkár resursa maid ferte buorebut gozihit. Dat lea erenoamáš deaŧalaš boaittobeale guovlluin mat rahčet eretfárremiid geažil, dadjá doarjjastivrra jođiheaddji Ann-Mari Thomassen (NSR) loahpas.
 
(Gáldu: Sámediggi)

Gulahala:

Ann-Mari Thomassen, mobil 90057123

Sámedikki doarjjaortnegat ealáhusaide

Ann-Mari Thomassen lea evttohas Viesttarmeara válgabiires

Digaštallan NRK Sámi Radio neahttasiiddus

Denne teksten på norsk