Álttá sámi váhnenfierpmádaga jahkečoahkkimis gullui movt sámi mánát ja váhnemat juohke beaivvi fertejit rahčat sámegieloahpahusain suohkanis.
Vuoigatvuodat ja giellaáittardeaddji
- Sámegieloahpahus lea oalle summal sámi giellahálddašanguovllu olggobealde ja lea hui soaittáhagas ožžot go mánát oahpahusa vai eai, cealká Muotka. – Ii galgga leat juohke váhnema duohken hommet vai oažžu sámegieldiimmuid skuvllas dahje juo buot oahpahusa sámegillii, cealká Muotka. Su mielas galggašii dakkavide veahkehit mánáid. Dál adnojuvvojit eiseválddiid dárbbut deháleabbon go mánáid dárbbut.
- Norgga Sámiid Riikkasearvi (NSR) lea máŋgii gáibidan ovttaskas vuoigatvuođaid sámi mánáide. Ovttaskas mánás galggašii leat vuoigatvuohta oažžut sámi mánáidgárde- ja skuvlafálaldaga iežas gillii, vaikko leaš dušše okta mánná gáibideamen dan. Mii leat maid árvalan ásahit sorjjakeahtes sámi giellaáittardeaddji, cealká Muotka.
Eai válbme maidege
Muotka muitala ahte Álttá váhnemat eai šat dieđe maid dál bargat go suohkan bidjá juohkelágan hehttehusaid sin ovdii. Váilevaš sámegieloahpahus, boasttu dieđut ja suohkan lea vel evttohan eahketskuvllas oahpahit mánáide sámegiela.
Unnán mánáidgárdesajit
Muotka muitala suohkanis leat unnán sámi mánáidgárdesajit. Hástalusat leat sihke skuvllas ja mánáidgárddis, ja dál lea hirbmat dárbu oažžut eambbo sámi mánáidgárdesajiid – Álttás leat máŋggas geat háliidit saji sámi mánáidgárdái. Suohkan ii leat beroštan ásahit sámi fálaldagaid suohkana mánáidgárddiide, vaikko váhnemat leat dan gáibidan vaikko man galle geardde. Čavčča rájes leat máŋga váhnema geain váilu sámi mánáidgárdesadji, cealká Muotka.
Eai oaččo oahpahusa sámegillii
Suohkan ii leat ráhkkanan oahpahit min mánáid sámegillii čavčča rájes.
– Suohkan politihkkárat hilgot mánáid dárbbuid. Mánát dárbbašit oahpahusa iežaset gillii, ja de suohkan geavaha byrokráhtalaš ákkaid go eai sealgga ordnet oahpahusa, cealká Muotka. Mun lean suorganan go suohkana politihkkárat atnet sápmelaččaid váttisvuohtan ja sisafárrejeaddjin, cealká Muotka.
Eai beroš ráđđehusa sámepolitihkas
– Stáhtaministtar Jens Stoltenberg finai Kárášjogas muitaleamen sámi giellapolitihka birra – ja mun jáhkken dál sii gal bargagohtet, cealká Muotka, muhto báikkálaš politihkkárat eai beroš Ráđđehusa sámepolitihkas. – Ja mun gal smiehtan maid son stáhtaministara bellodatustibat Sámedikkis oaivvildit dán áššis, loahpaha Muotka.
Váldde oktavuođa: Silje Karine Muotka, tel. 98 48 75 76
1. evttohas NSR-listtus Davviguovllu válgabiires
Denne teksten på norsk
Kommenter denne artikkelen
Kommentarer:
Ii fal vuollánit av Jonny 01.05.2009 23:28
Ii fal vuollánit dáinna áššiin. Helt ártet ahte Álttá suohkan ii ordne sámi luohká.