Ášši duogáš lea go Finnmárku fylka lea joatkkaoahpu sisaváldima oktavuodas juhkkojuvvon regiovnnaide. Dat mearkkaša ahte oahppit geat ohcet jo1:i, ožžot oahppasaji dušše skuvllain mat leat seamma regiovnnas gosa ieža gullet, jus fálaldagat maidda leat ohcan gávdnojit ruovtturegiovnnas.
Ferte leat vejolašvuohta ássat sámi birrasis
Kárášjoga oahppi gii ohcá ovdamearkka dihtii elektrofágii Áltái, ii beasa sisa dannego Hámmárfeasttas ja Honnesvágis maiddai lea seamma fálaldat ja dat gullaba seamma regiovdnii go Kárášjohka. – Ja dát dat lea ge váttisvuohtan. Ii oainnat váldo vuhtii vaikko oahppis livcce lagaš fuolkkit ja oahppásat Álttás ja Álttás lea ealli sámi biras mii gal duodai ii gávdno Hámmárfeasttas ja Honnesvágis, cilge Solbakken-Härkönen.
Soitet heaitit gaskan jus eai loavtte
Otná regiovdnajuohkin dagaha ahte muhtun sámenuorat eai beasa váldit dan oahpu maid háliidivcce jus eai leat mielas vuolgit skuvlii dakkár báikái mii soaitá sidjiide amas sihke kultuvrralaccat ja sosiálalaccat. Jus vulget, lea balahahtti ahte eai cadat skuvlla lohppii. Oadjebasvuohta lea dehálaš eaktu sihke loaktimii ja oahppamii. Logut cájehit ahte erenoamážit gánddat geat vázzet fidnofágalaš oahppoprográmmaid ruovttubáikki olggobealde, má?gii heitet gaskan, muitala Synnøve Solbakken Härkönen, gii ieš leamašan rektorin joatkkaskuvllas.
Váhnemat váldán oktavuoda
Ovddidan dán ášši, dannego muhtun váhnemat Kárášjogas leat váldán muinna oktavuoda dán birra. Mun oaivvildan leat min sámediggeáirasiid geatnegasvuohta loktet dakkár áššiid main olbmot beroštit, deattuha Solbakken-Härkönen.
Sámediggi ferte cuovvolit
NSR bivdá Sámedikki cuovvolit ášši ja váikkuhit dasa ahte galgá leat vejolaš spiehkastit regiovdnarájáin nu ahte sámi oahppit besset váldit oahpu dakkár báikkis gosa dovdet gullevašvuoda kultuvrralacct ja sosiálalaccat.
Loga maid: Ávjovári válgabiire listu 2009
Denne teksten på norsk
Kommenter denne artikkelen