NSR presideantaevttohas Aili Keskitalo (NSR) cuiggoda Bb ja Gaski go eai dorjon lasihit ruđa oahpponeavvuide.

NSR lei árvalan lasihit bušehttii 3 milliuvnna oahpponeavvobuvttadeapmái. Dan dagaimet go strategalaš plána geatnegahttá min sihkkarastit ahte ”nuvttá oahpponeavvuortnet” ii boađe ođđa oahpponeavvuid ovdii. Bargiidbellodaga bušeahtaárvalusa mielde Sámediggi ii nagot doallát dieid lohpádusaid. Lea go dat duođaid maid Bargiidbellodat ja muhtun eará listtut dáppe háliidit? Dájuhit olbmuid? Dájuhit oahpaheddjiid, ohppiid, álbmoga?

Summal váljen loguid

Plána- ja finánsalávdegoddái lea Salás, Sámi lágádusaid ja áviissaid oktasaš searvi, čilgen man heajus ovdabargu Bargiidbellodagas leat dahkan oahpponeavvoplána čuovvoleami oktavuođas. Okta ovdamearkka: go leat viggan rehkenastit man divrras nuvttá oahpponeavvuortnet šaddá, de leat dušše summal válljen muhtun loguid. Lea go Bargiidbellodat váldán oktavuođa lágádusaiguin jearrat sis rávvagiid ja árvvoštallamiid man divrras šaddá? Eai leat – vaikko sis lea fágačehppodat, ja vásáhusat das ahte dat mii leaš nuvttá lea eanet geasuheaddji.

Duhtadit dušše buoiddes sátnejođiheddjiid

Salás lea čilgen lávdegoddái ahte jus galgá leat vejolaš čađahit strategalaš oahpponeavvoplána  - sihke buvttadit ođđa oahpponeavvuid maid skuvllat dárbbašit – ja de fállat daid nuvttá suohkaniidda dan bokte geahpidit suohkanbušeahtaid – de ferte Sámediggi maid leat gearggus bidjat resurssaid dasa. Ja dan mii dahkat NSRas! 3 milliuvnna! Bargiidbellodat áiggošii dájuhit skuvlamánáid. Sin bušeahta mielde gal duhtadit muhtun buoiddes sátnejođiheddjiid ja ráđđeálbmáid – muhto skuvlamánát eai boađe gal oažžut eanet sámi skuvlagirjjiid.

Bb dáhttu geahpedit sámegiela skuvllas

Muhto dat soaitá leat justte bargiidbellodaga plánaid mielde? Mii han leat gullan Kárášjoga Bargiidbellodaga ođđa skuvlapolitihkka birra. Eanet dárogiel- ja eŋgelasgiellaoahpahus vai birget máilmmis – ii han dainna sámegielain gal olát gosage? Ja Kárášjoga Bargiidbellodat dáhkidit ahte jus sin jienastit sámediggeválgii – jus jienasta Egil Olli – de gal lohpidit eanet dárogieloahpahus sámi mánáide – eai soaitte oba dárbbašit sámi oahpponeavvuid.

Eai čađat iežaset plána

In ipmir Bargiidbellodaga oahpponeavvopolitihka. Leat árvalan plána, muhto eai áiggu čađahit dan. Leat gáibidan ráđđehusas eanet resurssaid sámi oahpponeavvuide – leat moaittán garrasit Bargiidbellodaga ráđđehusa go eai vuoruhan dan stádabušeahtas.

Dál go NSR áigu nannet oahpponeavvoprodukšuvnna – de ii leat fáhkka dárbu eanet resurssaid. Bargiidbellodat ii leat jáhkehahtti, ráđđelahttu Gaski ii leat jáhkehahtti go dal čuoččuha ahte ii leat dárbu min 3 millijovdnii, beaškala Aili.