- Sámepolitihkas fokuserejuvvo ollu vuođđoealáhusaide, guohtuneatnamiidda, boraspiriide ja šárkkaide. Dat lea dehálaš. Muhto eanet ah` eanet sápmelaččat bajásšaddet dahje ásaiduvvet gávpogiidda ja čoahkkebáikkiide. Odne leat máŋggat sohkabuolvvat, geat leat riegádan ja bajásšaddan gávpogiin. Dát lea dolvon viidát áddejupmái sámi ássamii, kultuvrii ja identitehtii, muhto lea maid mielddisbuktán ođđa hástalusaid, muittuha sámediggeáirras Lene Hansen (NSR).
Dohkkehit dán ge eallinvuogi
Hansena mielas lea ge dehálaš bargat dorvvastan dihte sámi servodaga gávpogiin ja stuorát čoahkkebáikkiin, ja ná dohkkehit dán eallinvuogi seamma dásis árbevirolaš sámi servodaga eallinvugiiguin.
Čevllohallat sámivuođain
- Earenoamáš dehálaš lea mánáide ja nuoraide láhčit dili nu ahte sin gávpotárgabeaivvis oidno ja gullo sámivuohta. Fertet bargat buoridit eallinkvalitehta ja ovdánanvejolašvuođaid beroškeahttá das orrutgo gilis vai gávpogis. Gávpotsámit galget maiddái boahtteáiggis háliidit čevllohallat iežaset sámivuođain, cealká Hansen.
Kommenter denne artikkelen
Tips en venn Gå tilbake