Norgga Sámiid Riikkasearvi (NSR) lea buktán oktasaš rievdadanevttohusa Sámeálbmot Bellodagain (SáB) Sámedikki plána- ja finánsalávdegottis sámediggeráđi 2009 bušeahttaárvalusa ektui. Maiddái Čielga Sámiid Jiena (ČSJ) Jánoš Trosten, Johttiidsámi Listtu (JL) Per A. Bær ja Åarjel Læstoe (ÅL) Kirsten Appfjell leat evttohusa duogábealde. Rievdadusat gusket sullii 12 milliuvnna ruvdnui.
Oahpponeavvut
- Mii vuoruhat eanet ruđaid earret eará sámi oahpponeavvuide, nuoraide, ealáhusaide ja gillii. Visot dát leat dehálaš suorggit. Mii dovdat bures dan erenoamáš váttes oahpponeavvodili sámi skuvllain, ja danin áigut nannosit lasihit ruđaid ođđa oahpponeavvuid buvttadeapmái, cealká Sámedikki plána- ja finánsalávdegotti jođiheaddji Roger Pedersen (NSR).
Eanet ruđat álbmogii
- Sámedikki leat ovdal moaitán go geavahit vátna ruđaid siskkáldas hálddašeapmái. Dán mii dál geahččalat buoridit, ja min bušeahttaárvalusas mii vuoruhat eanet ruđaid álbmogii. Mun dieđusge sávan Bargiidbellodat sáhttá dan doarjut, cealká sámediggeáirras Terje Trettnes (SáB).
Eriid ja fátnasiid oastit
- Mii evttohat vuosttaš geardde Sámedikki historjjás bidjat ruđaid sierra rekrutterenpostii, sihkarastindihti rekrutterema guolástanealáhussii sámi guovlluin. Dát guoská eriid ja fatnasiid oastimii, muitala sámediggeáirras Jánoš Trosten (ČSJ).
Heargevuoddjin
- Mii lasihat juolludeami heargevuodjimii, mii lea dehálaš sámi valáštallansuorgi. Mii áigut maid lasihit árvoháhkama bohccobierggu, duoji ja mátkeealáhusa ektui. Dát lea dehálaš čalmmustahttindihti nissonolbmuid boazodoalus, dadjá Per A. Bær (JL).
Girjjálašvuohta
- Lean erenoamáš movtta go lasihuvvo ruhta sámi girjjálašvuhtii. Mus lea buorre doaivva ahte dat mielddisbuktá eanet girjeálmmuhemiide máttasámegillii, cealká Kirsten Appfjell (ÅL).
Kommenter denne artikkelen
Tips en venn Gå tilbake