Vuođđun das lei heajos áššemeannudeapmi, váilevaš ja boastto sisdoallu, ja ii baljo makkárge oktavuohta daid ásahusaiguin geasa dat guoská. Nu šattai ge imašlaš gieđahallan lávdegottis mii loahpahuvvui preassakonfereanssain gos sámediggepresideanta Egil Olli (BB) áittii guođđit virggis.
Livčče galgat boktit BB
Buot cuiggodeamit opposišuvnnas, sámi ásahusain ja mediain livčče galgat boktit Bargiidbellodaga. Muhto nu ii geavvan. Čiegadandihti iežaset čurbošemiid, beaškalii presideanta ahte “speallannjuolggadusat” leat rihkkojuvvon danin go opposišuvdna vissa ii diktán ráđi buktit iežaset dieđáhusa. Dás eai leat ođđa njuolggadusaid birra sáhka.
Menddo heajos ovdabargu
Duohtavuohta dán áššis lea ahte sámediggeráđđi, man Bargiidbellodat stivre unnitlogus, lei dahkan menddo heajos ovdabarggu ovdal go gárvvistedje dieđáhusa. Go lea unnitlogus, de ferte dan mielde hapmet iežás politihka – ferte earáiguin ovttasbargat ja ohcalit eanetlogus doarjaga. Dán ii leat BB-ráđđi ipmirdan, vai eai go dáhto ipmirdit?
Manin nu alla speallu?
Mun sákka imaštalan go Olli spealla ná alla politihkalaš spealu dán áššis. Dáhtun muittuhit ahte dát ii leat eisege vuosttaš ášši BB-ráđis man plána- ja finánsalávdegoddi lea ferten máhcahit ráđđái dárkilat gieđahallama dihtii. Miessemánus sáddii ovttajienalaš lávdegoddi Sámedikki dásseárvvu doaibmaplána ruovttoluotta sámediggeráđđái, go dokumeanta njuolgut ii doallan dási. Dalle eai gullon Bargiidbellodagas nimmordeamen.
Eat sáhte doarjut heajos evttohusa
NSR dáhttu ahte ásahusášši sáddejuvvo albma gulaskuddamii daid ásahusaide geasa dat guoská, ovdal go Sámediggi dan meannuda. Gulaskuddancealkámušaid ferte de goarrut ođđa dokumentii mii biddjo Sámedikki ovdii. NSR ii sáhte doarjut heajos evttohusa vaikke mo de sámediggepresideanta dan sávašii.
Kommenter denne artikkelen
Tips en venn Gå tilbake