Árktalaš eamiálbmotgielat sisttisdollet erenomaš dieđuid davviguovllu birra. Diehtu lea vásihuvvon ja leavvan davviguovllus – davviguovllu váras. Dat gaskkastuvvo giela bokte buolvvas bulvii. Seammás leat máŋga eamiálbmotgielat davviguovlluin áitojuvvon.
Gielat gillájit
- Servodat ovdána issoras leavttuin davvin, dan botta go gielat mat gaskkustit máhtu mii lea duháhiid jagi čađa ahtanuššan, gillájit. Suitit go mii diktit dán máhtu mannat duššás? Eat. Mun baicca oaivvildan dát máhttu galgá leat mielde davviguovllu hálddašeami hábmemis, cealká Gunn-Britt Retter, Sámeráđi árktalaš – ja birasossodaga jođiheaddji.
Čohkkejit eamiálbmotgiellačehpiid
Boahtte vahkkus deaivvadit eamiálbmotgiellačeahpit, geat bohtet miehtá árktalaš guovllu, juohkit vásáhusaid ja ovddidit konkrehtalaš strategiijaid nannen dihte eamiálbmogiid gielaid. Canada, Árktalaš ráđi mielláhttu riika, lea ruhtadan lágideami gos Inuit Circumpolar Cuoncil (ICC) ovttas Sámeráđiin bovdeba eamiálbmotgiellačehpiid Romsii giellapolitihka digaštallat golggotmánu 19.-21. beivviid.
- Mii fertet searválagaid nannet eamiálbmot gielaimet ja dát gielladeaivvadeapmi lea ge guovddážis dasa, lohká Duane Smith, ICC Canada jođiheaddji.
Árktalaš Ráđđi čuovvola barggu
Gielladeaivvadeapmi lágiduvvo Árktalaš ráđi bistevaš ovdáneami bargojoavkku olis. Árvalusat deaivvadeamis dolvojuvvojit Árktalaš ráđi ministtarjulggaštussii ja doaibmaplánaide. Árktalaš ráđi ministtarčoahkkin, mii loahpaha Norgga jođihangotti, lágiduvvo Romssas boahtte jagi cuoŋománus.
Norgga Sámiid Riikkasearvi (NSR) lea okta Sámeráđi miellahttoservviin.
Kommenter denne artikkelen
Tips en venn Gå tilbake