- Mii áigut čuovvolit čoahkkinjođihangotti árvalusaid. Lea okta sátni mii lea dagahan eahpesihkarvuođa, ja lávdegotti bealis mii berret de diktit sin geat leat buktán árvalusa divodit árvalusa nu ahte ii oktage galgga dárbbašit eahpidit dan sisdoalu, cealká Sámedikki plána- ja finánsalávdegotti jođiheaddji, Roger Pedersen (NSR).
Ii rievdat ášši sisdoalu
Norgga Sámiid Riikkasearvvi (NSR) joavkojođiheaddji, gii lea duogábealde árvalusa, Aili Keskitalo, deattuha ahte redigeren ii rievdat ášši sisdoalu. NSR ain čuoččuha ahte ášši ferte sáddejuvvot gulaskuddamii daid ásahusaide geasa dat guoská, ovdal go Sámediggi dan loahpalaččat meannuda.
- Dás lea sáhka dušše smávva gielalaš rievdademiin mii ii rievdat sisdoalu min árvalusas. Mii diehttelasat váldit vuhtii čoahkkinjođihangotti rávvagiid, ja leat mielas rievdadit dán ovtta sáni, cealká Keskitalo.
Ášši ii ge dieđáhus gulaskuddamii
Sátnegeavaheapmi mii lea dagahan eahpesihkarvuođa, ja maid čoahkkinjođihangoddi dál bivdá lávdegotti rievdadit, lea ahte lea go ”dieđáhus” vai ”ášši” mii galgá sáddejuvvot gulaskuddamii. NSR áigu dál rievdadit nu ahte árvalusas daddjo ahte ”ášši ferte sáddejuvvot gulaskuddamii”, iige “dieđáhus ferte sáddejuvvot gulaskuddamii”.
Gulahallandieđut:
Roger Pedersen, Sámedikki plána- ja finánsalávdegotti jođiheaddji (NSR), tlf. 970 62 344
Aili Keskitalo, NSR joavkojođiheaddji, tlf. 971 29 305
Kommenter denne artikkelen
Tips en venn Gå tilbake