- Oktasaš davvinorgalaš mátkeealáhusfitnodat livčče erenoamáš dehálaš guovllu márkanfievrrideamis. Dađi bahát orru leamen nu ahte sámi beroštumit ohpihii leat vajálduvvon, vaikke vel sámivuohta lea guovddáš oassi Davvi-Norgga mátkeealáhusas, cealká sámediggeáirras Ann-Mari Thomassen (NSR).
Sápmelaččat fertejit oasálastit
NSR oaivvilda ahte sámi kulturovdanbuktimat galget adnojuvvot árvvus mátkeealáhusas, ja dainna vugiin ahte dat bohtet sápmelaččaide alcceseaset ávkin. Dan ii olat jus sápmelaččat ieža eai oasálastte guovllu mátkeealáhusáŋgiruššamis.
Suopma ii leat ovdagovva
- Dál mun vuorddán ahte Sámediggi, mii galgá buktit eavttuid sámi mátkeealáhusáŋgiruššamis davvin, goallostuvvo ođđa fitnodaga plánaide. Suoma mátkeealáhussii leat leavvan “plastihkkasápmelaččat” ja sámi dávvirat mat leat Hong Kongas ráhkaduvvon. Dán eat dáhto áddestallat dáppe Norggas. Danin lea ge nu dehálaš ahte sápmelaččat leat ieža mielde váikkuheamen doppe gos mearrádusat dahkkojuvvojit, cealká Thomassen.
Fylkkasuohkanat mearridit
Lea Riikkaoasselávdegoddi (Landsdelsutvalget) mii ovttajienalaččat lea mearridan ásahit fitnodaga mii olgoriikkas galgá márkanfievrridit ja geasuhit turisttaid Davvi-Norgii. Fitnodat galgá leat ovttasbargu gaskal ealáhusoasálastiid ja Nordlándda, Romssa ja Finnmárkku fylkkagielddaid.
Ášši meannuduvvo fylkkagielddain golggotmánu 13., 14. ja 15. beivviid. Riikkaoasselávdegoddi loahpas mearrida áššis iežas čoahkkimis 19.-20.11.2008.
Kommenter denne artikkelen
Tips en venn Gå tilbake