Viessu lea dehálaš čoahkkananbáiki sápmelaččaide geat ásset Oslos ja guovlluin birra oaivegávpoga.
Bargiidbellodat Sámedikkis evttoha dieđáhusas ahte doarjja Sámi Vissui Oslos galgá váldot eret Sámedikki dábálaš bušeahtas, ja baicce sirdojuvvot ođđa doarjjaortnegii gos jahkásaččat ferte ohcat doarjaga. Dát mielddisbuvttášii lassibarggu ja eahpesihkkaris dili Sámi Vissui. Sámi Viessu gárttašii de juohke jagi ohcat doarjaga, ja jagis jahkái eallit eahpesihkarvuođain das man olu doarjaga sii ožžot.
Ii leat ovttaoaivilis Bargiidbellodagain
Mun in leat ovttaoaivilis Bargiidbellodagain ahte dát livčče buorre čoavddus. Mun baicce oaivvildan ahte Sámi Viessu Oslos ánssáša bissovaš ja buriid rámmaeavttuid. Lea min sámediggeáirasiid bargu sihkkarastit buriid ovdánanvejolašvuođaid sámi ásahusaide – maiddái oaivegávpogis.
Reivves Sámedikki plána- ja finánsalávdegoddái deattuha Oslo Sámi Viesu stivra ahte:
”Sámi Viessu jođihuvvo eanaš eaktodáhtolaš vuođu alde. Danin lea ge justa einnostahttivuohta fásta doarjaga bokte Sámedikki dábálaš bušeahtas nu dehálaš. Jus dán rievdada de mielddisbuktá ahte guhkitáigge plánen ja viesu ovdánahttin šaddá váddásat, dahje dadjat juo veadjemeahttun. Viesu fertešii de vuođustit oanehašáigge prošeavttaide, dainna eahpesihkarvuođain maid dat mielddisbuvttášii”.
Dađi bahát ii oru Bargiidbellodat váldimin daid ákkaid bealljái.
Sádde dieđáhusa gulaskuddamii!
Nu go olu ásahusat ieža leat gáibidan, de gáibida maiddái Sámedikki opposišuvdna ahte ásahusdieđáhus sáddejuvvo gulaskuddamii ovdal go Sámedikki dievasčoahkkin dan meannuda. Mun sávan ahte Sámedikki eanetlohku doarju dán gáibádusa, ja mun duođaid sávan ahte sámediggepresideanta nákce čájehit vuollegašvuođa áššis ja váikkuhit nu ahte mii fárrolagaid sáhttit bargat sámi ásahusaid boahtteáigái buorrin!
Kommenter denne artikkelen
Tips en venn Gå tilbake