- Mun oaivvildan dákkár orgána livččii čájehan midjiide gokko sámi giellaláhka rihkkojuvvo, ja mii leat máŋgii hállan dan birra Norgga Sámiid Riikkasearvvis (NSR) ahte livččii dárbu dákkár friddja orgánii. Orgána livččii veahkkin go oktonas olmmoš bártida giellaáššiiguin almmolaš ásahusas. Ja, šattašii álkit diehtit gosa galgá váidit go giellaláhka rihkkojuvvo. Muhto eai váttisvuođat dattege jávkkašii, ja unnán leat dieđut sámegielvuoigatvuođaid birra almmolaš ásahusas, deattuha Anti.
Máŋgii váidalan
Mii han leat máŋgii váidalan, sihke oktonas olbmot, politihkkárat ja organisašuvnnat, ja medias cuiggodan go giellaláhka ii čuvvojuvvo. Lea oalle lossat vuodjit dákkár áššiid medias, danne go guoská olmmošárvui go ii beasa hállat sámegiela doppe gos livččii lunddolaš sámegiela hállat. Min politihkkárat leat cuiggodan váilevaš sámegielgeavaheami sihke NAV ásahusas, unnán válgadieđut sámegillii, heajos dilli dikkis, sámegiella duvdiluvvon dobbelii livnnethoavddaid luhtte, unnán dulkkat buohcceviesuin ja váilevaš sámegieloahpahus.
Valle duvdila ovddasvástádusa earáide
De dál leige áigi ahte ráđđehus ja stáhtačálli Raimo Valle mieđihedje ahte giellaláhka rihkkojuvvo juohke beaivvi. Muhto, go stáhtačálli dáhttu buot sápmelaččaid váidit láhkarihkkuma, de han duvdila ovddasvástádusa earáide, iige váldde šat ieš ovddasvástádusa. Go juo gearddi ráđđehus diehtá dán váttisvuođa birra, de berre juoga dahkat dainna. NSR lea gal dieđusge duhtavaš go departemeanta lea ráhkadeamen giellaplánaid, muhto gal mii diehtit maid, ahte giellaplánat mis gal leat juo oalle látnan, ovdalaččas juo. Mis váilot doarvái sámegielhálli fágaolbmot, ruhta váilo ja de váilo vel bearráigeahččanorgána mas livččii spižá daidda geat eai čuovo lága.
Kommenter denne artikkelen
Tips en venn Gå tilbake