Ájluokta skåvla/Drag skole Divttasvuonas, ja Báhko girjelágádus leigga ohcan ruhtadoarjaga eará bargovuogádaga julevsámi oahpponeavvobuvttadeapmái ovdánahttit, muhto Sámedikkeráđđi biehttalii ohcamiid. Norgga Sámiid Riikkasearvi lea beahttašuvvan.
- NSR evttohii, ja oaččui dohkkehuvvon resursaskuvllaid reaidun Sámedikki ođđa oahpponeavvoplánii, muhto plána doaibmá easkka ođđajagi rájes, dadjá NSR parlamentáralaš jođiheaddji, Aili Keskitalo.
- Ávžžuhan sámedikkeráđi farggamusat gulahallat Divttasvuona suohkaniin, vai plánat sáhttet duohtandahkkot 2009:s, joatká Keskitalo.
Dušše moatti olbmuin lea gelbbolašvuohta buvttadit oahpponeavvuid julevsámegillii, ja máŋgasat sis barget justte Ájluovtta skuvllas.
- Okta sivvan man dihte lea váttis oččodit oahpponeavvočálliid, lea go bálkkádilálašvuohta ja sosiála vuoigatvuođat šaddet eaŋkilolbmuid váttisvuohtan, dadjá sámedikkeáirras Tone Finnesen (NSR).
NSR oaivvilda ahte oahpponeavvoovdánahttin resursaskuvla sáhttá fállat oahpponeavvobuvttadeddjiide seammá bargoeavttuid ja sosiála vuoigatvuođaid mat sis leat oahpaheaddjin. Dasa lassin sáhttá fállat fágabirrasa mii lea doarjun, ja dákko bokte oččodit eanet oahpponeavvočálliid.
Ráđđelahttu Jørn-Are Gaski (Bb) cealká Sámeradioi 24.06.08 ahte son ii fuollá “oahpponeavvorepublihkaid”. Gaski orru vajálduhttán ahte ođđa oahpponeavvoplána addá vejolašvuođa eará vuogi mielde organiseret oahpponeavvobuvttadeami - resursaskuvlla ortnega bokte.
- Sámediggi berre oaidnit Divttasvuona suohkana ja earáid vejolaš ovttasbargoguoibmin oahpponeavvobuvttadeamis, eai ge gilvaleaddjin, dadjá Aili Keskitalo.
Kommenter denne artikkelen
Tips en venn Gå tilbake