Mii lea du buoremus geassemuitu?
Miessemánu 7. beaivvi 1998 ožžon iežan vuosttaš nieiddaža, Maja. Lei buorre riegádusáigi ja justa muttágis dálki munnuide.
Maid leat plánen geasseluomus hommát?
Dán geasi áiggun eaktodáhtolaččat bargat Márkomeannu festivála ovddas ja boares skuvllas Sáttiidvuomis. Dasa lassin lean plánen divodit áddjá ja áhkku boares viesu, ja vel iežamet dálu. Áiggun maid veahkehit čohkket ealu, murjet ja jávrris oaggut. Maŋŋelis geassit áiggun darfet goađi. Šaddá maid áigi vahkkoloahpaid finadit Lofuohtas ja Divttasvuonas. Suoidnemánus lea olles min bearaš vuohččan vuolgimin lieggariikii. Dasa sihke illudan ja lean veahá balus.
Maid don áinnas borat ja jugat geassebáhkkan?
Smávva sáiddiid mat leat mearračázis vuššon dolas fiervvás, ja dasa heive beassegáhkku! Dahje rávddut bassojuvvon bánnos doppe váris. Muđuid boran geahppa borramušaid ja jugan ollu čázi go leat báhkat.
Makkár musihkka addá dutnje geassedovddu?
Musihkka Márkomeannu festiválas.
Maid barggašit jus beasašit stádaministtarin ovtta beaivái?
Dohkkehivččen davviriikkalaš sámekonvenšuvnna – ja bággehivččen Ruoŧa ja Suoma ge dan seamma dahkat!
Geasa attášit čuoikačuggestaga?
Ráđđehussii. Sii leat bidjan menddo guhkes gulaskuddanáiggi Sámi vuoigatvuođalávdegotti 2 ja riddoguolástanlávdegotti láhkaárvalusaide. Guhkes áigemearit mielddisbuktet ahte dáid áššiid eai geargga gieđahallat dán stuorradiggeáigodagas. Dán áššis gal lea Ráđđehus leamašan geanoheami. Sámi vuoigatvuođat eai geasut jienasteddjiid dáčča bellodagaide, nu ahte in dieđe mii bázeš láhkaárvalusain maŋŋá go válgabohtosat 2009 čilget.
Leat go mannamin makkárge festiválii dan geasi?
Márkomeannu festiválii dieđusge.
Gii ánssáša rámi?
Mu eadni Kristine gii eallinagi lea dorjon olles bearraša. Son lea álo veahkehan earáid ii ge leat goassige sihtan maidege dan ovddas. Son lea duođaid gievrras nisu.
Makkár geassemuittu háliidivččet vajáldahttit?
Mu vearrámus geassemuitu lea 1995 geasis, go mu boarráseamos bárdni Tom massii iežas áhči ilgadis mohtorsihkkellihkohisvuođas. Morašteimmet geasi ja čavčča. 2005 geasi ges buohccái mu áhčči Harry ja gárttai Harstad buohccivissui. Dan geasi leimmet mii lagaš olbmot rahkadan váktaortnega buohcciviesus nu ahte álo lei olmmoš áhčči luhtte. Son galggai leat oadjebas dasa ahte son oaččui buoremus divššu maŋemuš áiggi. Son jámii álggogeahčen čakčamánu – aiddo dalle go Sámedikki válgagižžu lei garraseamos. Čihken morraša siskkimusat iežan váimmus. Ii mus lean vejolašvuohta moraštit, in ge gártan morrašiin dahkat maidege. Easka dalle go NSR guđii fámu Sámedikkis 2007 čavčča bállejin moraštit.
Geasselohkamuš?
Dán geasi áiggun lohkat ”Falne engler” man Gunnar Staalesen lea čállán, Anne B Ragde girjji ”Berlinerpoplene” ja de ferten vel oaidnit makkár girjjiid Skániid Girjie dahje eará sámi lágádusat vuvdet Márkomeannus.
Man haga it birge luomus?
Beaivvášlásiid ja juoga maid sáhtán lohkat.
Mii lea du geasseparadiijás?
Sámi giláš Sáttiidvuopmi. Doppe mus lea viessu maid lean árben iežan boareseatnis ja boaresáhččis. Dan láven divodit juohke geasi. Bargobeaivvi maŋŋá lea buorre olggos nohkkat ja beare gullat sávzabielluid gittiin mat leat das birra.
Gean válddášit fárrui luomejeaggái?
Iežan mánáid dieđusge! Lea dehálaš ahte sii ge besset gullat buot daid muitalusaid mat leat čatnon jekkiide maid ieš ge lean iežan váhnemiiguin gullan. Dat lea dan birra ahte gii beassá guđe jeakkis lubmet, manin luopmanat eai leat geasis šaddan, jeaggebihtáid birra gos dušše ulddat besset lubmet jnv.
Gean válddášit fárrui ávdin sullui?
Iežan elošteaddji Sten. Munnos ii báze olus áigi guovttá leat – álo leat manát ja lágaš olbmot gáibideamen fuomášumi, dahje juo lea organisašuvdnabargu, eaktodáhtolaš bargu duoppil dáppil, politihkka, čorgenbarggut, divodeamit, muoraid guoddit áitái ovdal dálvvi, murjet, darfet goađi jnv. jnv.
Maid barggašit jus beasašit kulturministtarin ovtta beaivái?
Ledjen roahkka juolludit 200 millijovnna kulturviesuide mat galget Sámedikki kulturviesoplána mielde huksejuvvot.
Kommenter denne artikkelen
Tips en venn Gå tilbake