Mii lea du buoremus geassemuitu?
In fuobmá maidege. Muhto mus leat guokte niegut maid in leat vel šaddan ollášuhttit. Vuosttaš lea čohkohallat brukkas skihpáriiguin fárrolagaid, ja šluvggášit julggiid boradettiin váras reahkáid ja jugadettiin ovtta glása vilgesviinna. Nubbi niehku lea teltet Guollevágis dahje Hamningsbergas ja bassit váras mearraluosa dolas.
Maid leat plánen geasseluomus hommát?
Divodit mánnávuođaruovttu Suovvejogas, man mun dál oamastan. Mus leat plánat fárret dohko ovdal juovllaid.
Geasa attášit čuoikačuggestaga?
Na attášin vieksáčuggestaga Olav Gunnar Balloi. Čuoikačuggestat ii hilaš doarvái.
Makkár geassemuittu háliidivččet vajáldahttit?
Dan gal lean vissa juo vajáldahttán… in goit fuomáš maidege. Eleanor Roosevelt han dajai ge oktii: ”Jus dus galgá leat buorre eallin, de dus ferte leat buorre dearvvašvuohta ja heajos muitu”.
Maid don áinnas borat ja jugat geassebáhkkan?
Lákcajieŋa! Lemonade, ja iešguđet lágan saláhtaid. Danmárkkus ožžon dávjá ”koldskål” go lei báhkka. Dan sáhttá buohtastahttit kefirbimiin ja kávrregiiguin – ja dat han lea oalle njálggat go lea báhkka.
Makkár musihkka addá dutnje geassedovddu?
Niko Valkeapää. Vamp ja Postgirobygget lea maid vuogas geassemusihkka.
Maid čájehivččet turisttaide geat fitnet Unjárggas?
Ceavccageađgi kulturmuitoguovllu. Dat livčče máilmme buoremus UNESCO báiki. Ja vel válddášin sin fárrui fatnasii ovtta eahkeda go lea goalki ja čájehivččen olles Unjárgga mearabeale.
Mii lea du geasseparadiijás?
Min boares viessu, mii fargga šaddá mu ođđa ruoktu.
Gean válddášit fárrui luomejeaggái?
Fertešin váldit eatni ja su oarpmeali Birgitte fárrui. Soai dat dovdaba eanaš jekkiid ja diehttiba gos gávdná luopmániid. Dasa lassin lea sudnos suovvejot-suopman, ja lea hearvái leat sudnon fárrolagaid.
Gean válddášit fárrui ávdin sullui?
In dieđe, muhto fertešii leat muhtin gii gille mu guldalit seammás go munnos galggašedje ságat bistit guhkit áiggi badjel. Hmm, gii son dat sáhtašii leat…? Jo, dal de dieđán; Arne Næss 10 jagi áigi.
Maid barggašit jus beasašit stádaministtarin ovtta beaivái?
Dalle mun dohkkehivččen Davviriikkalaš Sámekonvenšuvnna, ja de ledjen ávžžuhit Ruoŧa ja Suoma dahkat dan seamma. Seammás ledjen ásahit rutiinnaid nu ahte čuvvot doarvái ruđat mielde vuoi sáhttá ollášuhttit konvenšuvnna vuođđojurdagiid. Dasto ledjen bargat dan ala ahte sápmelaččat Ruošša bealde Sámis maid fátmmastuvvot dán konvenšuvnnas. Dat mealgadii geahpedivčče daid hástalusat maid riikkaráját mielddisbuktet. Erenoamážit buot oahpahus, dutkan, oahpponeavvobuvttadeapmi ja girječállin.
Leat go mannamin makkárge festiválii dan geasi?
Jus vuolggán, de vuolggán Várjjat-festiválii.
Mii botkehivčče du luomostallama?
Sámeradio mii riŋge ja sihtet kommentáraid birasáššái, dálkkádatrievdademiide dahje guolástusáššái.
Gii ánssáša rámi?
Sii geat ain bivdet mearraluosaid, vaikke vel vikkahit sin juohke láhkai oažžut eret mearas.
Geasselohkamuš?
Maŋemuš jagiid leamašan Harry Potter. Muđuid logadan bláđiid ja románaid maid dálvet in leat bállen lohkat. Aiddo dál gal eanaš logadan bláđiid stohpoortnegiid birra.
Man haga it birge luomus?
”Reiseradioen” nammasaš prográmma NRK P1 kanálas.
Kommenter denne artikkelen
Tips en venn Gå tilbake