Mii lea du buoremus geassemuitu?
Mu buoremus geassemuittut leat min barttas Vuotnabađas Divttasvuonas, gos mun mánnán orrun máŋggaid mánuid juohke geasi. Guokte maŋemuš jagiid lean fitnan luomus Hellasis, ja doppe lea maid hirbmat buorre!
Mii illudahttá du?
Álggogeahčen geasi ledjen nu ilus go lei mannan nu bures eksámeniin. Ožžon A loahppaeksámenis buohccidivššárskuvllas, ja dan maŋŋá gal udnojin iežan vuoiŋŋastit ja bosihastit veahá. Lea ain hui buorre dovdu go lean geargan skuvllain!
Makkár geassemuittu háliidivččet vajáldahttit?
Eai mus leat vissa dakkár muittut maid háliidivččen vajáldahttit – in goit fuobmá ovttage.
Maid don áinnas borat ja jugat geassebáhkkan?
Grillaborramuš lea hirbmat njálggat geassit galbma juhkamušain.
Makkár musihkka addá dutnje geassedovddu?
”Sommartider” nammasaš lávlla man ”Gyldne Tider” joavku čuojaha lea albma klassihkkár:-)
Maid čájehivččet turisttaide geat fitnet du ruovttubáikkis?
Mis lea barta Vuotnabađas Divttasvuonas, ja doppe lea nu fiinnis. Ammal mun válddášin sin dohko várrái vázzit? Ii ge dies leat guhki Ruŧŧii ge vázzit…
Gean válddášit fárrui ávdin sullui?
Dohko válddášin iežan olbmá Andreasa. Moai letne aiddo álgalan, nu ahte áigi gal lei hurgilit johtilit ávdin sullos…
Maid barggašit jus beasašit dearvvašvuođaministtarin ovtta beaivái?
Dalle juolludivččen eanet ruđaid dearvvašvuođadoaimmahagaide. Ja de bijašin doaimmaid johtui buoridandihti kulturgelbbolašvuođa dáčča dearvvašvuođabargiin. Dat lea hui dehálaš jus sámi pasieanttain galgá leat seammaárvosaš dearvvašvuođafálaldat go earáin. Buot dásiin dárbbašuvvo gelbbolašvuohta sámi kultuvrras – sihke sis geat beaivválaččat barget pasieanttaiguin, sii geat barget hálddahusas ja jođiheddjiin. Ja dieđusge dárbbašit dearvvašvuođapolitihkkárat ge eambbo gelbbolašvuođa.
Gii ánssáša rámi?
Lean aiddo geargan eksámeniin, ja mus ledje máŋga skuvlaoappát geaiguin manai hui bures eksámenis. Sin mun háliidan rábmot!
Geasselohkamuš?
Dieđát go, mun in láve nu olu girjjiid lohkat. Eanaš váhkobláđiid logadan… Ja de liikon vel sudoku čoavdit!
Man haga it birge luomus?
Mun lean hui sorjavaš iežan telefovdnii, nu ahte dan mun ferten vástidit!
Ja maid roahkka guođát ruoktot?
Skuvlagirjjiid! Dál lean viimmat geargan maŋemuš eksámeniin, nu ahte dál in dárbbaš šat daid birra smiehttat. Lea nu buorre dovdu go lean geargan skuvllain.
Ja geasi maŋŋá..?
Dalle lean sávvamis ožžon barggu ja fárren. Áiggun geavahit geasi ohcat rabas virggiid, de leaš oaidnit gosa mun gárttan.
Kommenter denne artikkelen
Tips en venn Gå tilbake