Mii lea du buoremus geassemuitu?
Hmmm, mii son dal dat buoremus geassemuitu lea…? Dat ferte leat dan geasi go moai eamidin álgaleimme - geassit 1993. Dat gal lei hui buorre geassi!
Maid leat plánen geasseluomus hommát?
Moai vuoddjájetne máttásguvlui mánáiguin – finadat sihke Suomas ja Ruoŧas. Dan ii leat nu buorre diehttit justa gosa mii bisánat ja man guhkká jávkat - mii beare vuoddját fáhkkestaga, ja de han beassat oaidnit. Muhto váhku goit jávkat.
Geasa attášit čuoikačuggestaga?
Deanu gildii, go leat nu čurbošan guovttegielatruđaiguin.
Makkár musihkka addá dutnje geassedovddu?
Mun in leat duohta ságas dakkár musihkka-olmmái, nu ahte in dieđe dakkár erenoamáš geassemusihka...
Maid čájehivččet turisttaide geat fitnet du ruovttubáikkis?
Fertešin diehttelasat čájehit Deanu - sihke luossabivdu ja buođđun lea dakkár mii árvideames lea turisttaid miela mielde. Dat lea ge dat mii lea erenoamáš dáppe Deanus.
Gean válddášit fárrui luomejeaggái?
Luomejeaggái fievrridivččen muhtima gii lea viššal čoaggit, muhto in fuobmá gal gii dat livčče. Ferte leat muhtin gean udnon čuoikkaid sisa, ja de han ii sáhte vaikke gean váldit fárrui.
Maid barggašit jus beasašit sámediggepresideantan ovtta beaivái?
Gearggašin go son beaivvis čorget guovttegielatvuođaortnega? Goit álggahivččen dan barggu. Giellaovddideapmi lea ge mu váibmoášši.
Mii botkehivčče du luomostallama?
Mun barggan rektorin, ja ferten gárvet ja ráhkkanit buot bargguid čakčii, nu mo virgáibidjamat ja diekkárat. Jus in geargga buot bargguiguin ovdal luomu, de gal ii boađe luomostallmis ge mihkkege. Dál lean olles leahtuin doapmamin daid gerget ovdal go vuolggan lupmui...
Gii ánssáša rámi?
Valáštallan searvvit mat eaktodáhtolaččat barget mánáid ja nuoraid ovddas ja addet sidjiide astoáigefálaldaga. Mis leat ollu valáštallan searvvit dáppe Deanus, ja sii barget duođaid buori barggu man ovddas ánssášit rámi!
Geasselohkamuš?
Geasset logadan eanaš áviissaid ja fágačállosiid, nammalassii pedagogalaš čállosiid. Ferten geassit maid daid fágačállosiid lohkat, vaikke lea vel luopmu. Logan smávit artihkkaliid, ja oainnán dan buorre vejolašvuohtan ođasmahttit iežan pedagogalaš beali.
Man haga it birge luomus?
Ii leat mihkkege man haga in birge!
Leat go vuolgimin makkárge festiválii?
In leat gal dan plánen, muhto ii dan dieđe. Jus lean dáppe dáid guovlluin go Skiippagurrafestivála lágiduvvo, de sihkkarat šattan doppe bargat.
Kommenter denne artikkelen
Tips en venn Gå tilbake