Maid leat plánen geasseluomus hommát?
Dán geasi mun lean fárren Romsdalii, ovtta báikái man namma lea Bud. Moai fárriime loahpageahčen geassemánus, ja áiggun geavahit geasi oahpásmuvvat ođđa báikái. Mun lean juo álgán; liikon sihke merrii ja bacalaoi. In dieđe gal dien “blainnabaill” – dan gal jullot báikeolbmot ieža borrat.
Mihttomearri dán geasi lea hervet ja čiŋahit báhpagárdima gos galge orrut, ja áinnas háliidivččen gávdnat skihpára Romsdalas:-) Muđuid áiggun davás vuolgit, gávtti goarrut, lubmet, plánet munno heajaid, ja áinnas gearggehit stuorát oasi iežan masterbarggus.
Maid don áinnas borat ja jugat geassebáhkkan?
Váras sáiddi ja ájačázi.
Mii lea du geasseparadiijás?
Vuodnabahta siskkimusas Hellemo-vuonas. Várit ja vuotna doppe ruovttus! Dat lea mu mánnávuođaparadiijás, nu mo dat lea ollu earáide ge. Lávejit dadjat “oktii vuodnabadák, álo vuodnabadák”. Muhto liikon maid geassái máttanorggas. Oassi mu váimmus bázii dohko dalle go ássen Kristiansandas jagi. Láven geahččalit máhccat dohko nu dávjá go vejolaš. Lean finadeamen doppe borgemanus.
Gean válddášit fárrui luomejeaggái?
Mu isitávdnasa Sindre. Danin go son lea buorre almmái! Ja suinna lea somá leat fárrolagaid. Dasa lassin lea son mearragáttis eret, ja danin dárbbašivčče veahá váris fitnat, vaikke vel čuoččuha ge ieš ahte son ii leat nu váibmil luopmániidda.
Maid barggašit jus beasašit stádaministtarin ovtta beaivái?
Okta beaivi lea menddo unnán, mun gal dárbbašan olles jagi. Ledjen divvut eadneluomu nu ahte dat ii leat das gitta ahte eadni lea bargan 6 mánu ovdal go oažžu ruđaid. Berrešii leat doarvái ahte áhččeolmmoš lea bargan. Easka de juksat dásseárvvu. Die lea goit okta – nubbi ášši lea ahte rievdadivččen oahpahuslága nu ahte buot mánát ožžot sámegieloahpahusa gos dal de riikkas orošedje.
Geasselohkamuš?
Áiggun vuđoleappot lohkat teologiija. Berrešin lohkat juoga Paulusa reivviid birra, nu ahte áiggun geahčalit heivvolaš lohkamuša gávdnat. Go vuoiŋŋastit galggan, de gal logan kriminálalaš girjji, ja vel áiggošin lohkat muhtin girjji mii lea čállojuvvon eará sajis máilmmi.
Man haga it birge luomus?
Bátneguštta!
Ja maid roahkka guođát ruoktot?
Vuoidasiid ja interneahta!
Mii lea du buoremus geassemuitu?
Mearra, beaivvadat, skávhllit ja julggiiguin šlivggodit čázis.. Dahje jávrris vuojadit. Dalle lea geassi! Mus lea ollu eará geassemuittut maid, muhto dá dat lea maid oainnán go dálvet govččan čalmmiid ja niegadan geasi birra. Muđuid lea giđđa hui čáppa áigi Oslos. Olbmot bohtet olggos viesuin, čohkohallet párkkain ja leat buorimielas. JA lea erenoamáš buorre dovdu go muđuid riikkas lea čoaskkis! Haha…
Diibmá moai mis jođiime Helgelándarittu mielde 30 jagi boares campenbiillain. Dat gal lei duođaid buorre mátki! Čáppa luondu ja erenoamáš friddjavuođadovdu go buot maid moai oamasteimme lei mielde biillas. Moai beasaime vuoddjit ja bisánit gosa áigguime. Geassit galggašii ge leat friddjavuohta. Lihkkat goas áigu, dahkat maid háliida... ČAĐAT!
Kommenter denne artikkelen
Tips en venn Gå tilbake