Mii lea du buoremus geassemuitu?
Velohallat lásis, geahččat vuona ja vuoiŋŋastit – duollet dálle ain buokčalit čáhccái.
Maid leat plánen geasseluomus hommát?
go juo mus ii leat fásta bargu, de ii mearkkaš luopmu munnje dan seamma go earáide. Dan gease áiggun hommát kulturmuitoregistreremin, sáiddiid bivdit, meahccis vázzit, politihkket veahá, ja diehttelasat návddašit beaivváža dalán go dat guovlala balvvaid duohken.
Geasa attášit čuoikačuggestaga?
Sámediggeráđđeláhtui Jørn Are Gaskii dainna mo son lea govvádallan sámi oahpponeavvodili. Son lea issorasat vuojehan dien ”girjelátna” ášši oažžundihti hálbbes politihkalaš poeŋggaid. Ođđa oahpponeavvuid buvttadeapmi lea dat mii lea deháleamos dás ovddasguvlui.
Maid don áinnas borat ja jugat geassebáhkkan?
Váras sáiddi ja vuollaga!
Maid čájehivččet turisttaide geat fitnet du ruovttubáikkis?
Iežan oaggunbáikki vuonas, ja diehttelasat vel Olmmáivákki duodjesearvvi buori gávppi.
Gean válddášit fárrui luomejeaggái?
Sofia Jannoka, danin go de beasašin jearahallat su dáiddalaš bargometodaid ja musihkalaš goansttaid birra. Kánske son juoiggašii luopmána vel!?
Maid barggašit jus beasašit stádaministtarin ovtta beaivái?
Geahpedit oljo- ja gássabohkamiid Norgga aládasas.
Leat go mannamin makkárge festiválii dan geasi?
Riddu Riđđu! Ledjen áigun vuolgit Márkomeannui ge, muhto erenoamáš sohkadeaivvadeapmi bođii ovdii dán vuoro.
Gii ánssáša rámi?
Olbmot geat barget dujiin, eanadoaluin, boazodoaluin ja guolástemiin, vaikke vel rámmaeavttut eai leat ge buorit. Erenoamážit sii geat barget árbevirolaš vuogi mielde ja atnet luonddu árvvus. Dat lea nu dehálaš seailluhandihti sámi kultuvrra ja borramušárbevieruid.
Geasselohkamuš?
Áiggun nuppes návddašit ”Mengele Zoo” nammasaš girjji man Gert Nygårdshaug lea čállán. Jurddaš ahte Nils Gaup dál galgá ráhkadit filmma das!
Man haga it birge luomus?
Buori girjji, beaivelásiid ja beaivevuoidasa haga in birge.
Kommenter denne artikkelen
Tips en venn Gå tilbake