Mii lea du buoremus geassemuitu?
Go ledjen mánáiguin geasseluomus min barttas doppe Skálvejávrris Unjárggas – dalle beare šlárvešeimmet ja manát vuojadedje jávrris vaikke vel lei ain muohta jávregáttis.
Maid leat plánen geasseluomus hommát?
Vuodján biillain ja áiggun vuojašit 4 vahko njuolgut. Álggus vuoján Riddu Riđđui, dasto vuoján ges máttás Norgga čađa – gitta Notodden Bluesii ovdal go fas dollen davás. Ferten oainnat juksat luopmániid Máttavárjogas – ja áiggun maid leat fárrolágaid iežan áhkkubiiguin Katja-Margrethin go Ánddiin.
Maid don áinnas borat ja jugat geassebáhkkan?
Varas mearraluosa maid Gobis lean goddán ja vel goike vilgesviinna glásas.
Mii lea du geasseparadiijás?
Mu geasseparadiijás lea Gohppi – lean nu lihkolaš go lean doppe bajásšaddan. Ii mihkkege leat nu buorre go boardaga alde iđitgáfe jugadit – dan botta go beaivváš ligge mu ámadaju ja álás julggiid.
Gean válddášit fárrui luomejeaggái?
Iežan stuorraoappá Torila – munnos láve álo nu hearvái go vánddardetne fárrolaga dákkár mátkkiin.
Leat go mannamin makkárge festiválii dan geasi?
Nu go juo lean dadjan - Riddu Riđđu ja Notodden bluesfestivála.
Mii botkehivčče du luomostallama?
Ii fal ii mihkkege nagot botket mu luomostallama!
Gii ánssáša rámi?
Iežan stuorravielja Harry gii lea hirbmadit áŋgiruššan mearraguolásteddjiid vuoigatvuođaide. Mun jáhkán ja sávan ahte son oažžu ruhtadeami rahkadit filmma dan birra go stáda bijai guolásteddjiid gáddái. Lean lohkan prošeavtta birra ja dieđan ahte šattašii buorre filbman jus beare ruhtadeapmi meinnestuvvá. Son lea maid fárren ruovttoluotta Gohppái, ja čájeha ovttas eará ”nuoraiguin” Gobis ahte lea vejolaš cahket čuovgga daid viesuin mat muđuid ledje ávdin báhccit.
Geasselohkamuš?
Girjjiid maid Idar Kristiansen lea čállán – ráidu ”Kornet og fiskene”.
Man haga it birge luomus?
Iežan govvenapparáhtaid haga in birge – lean oainnat álo ohcamin buriid motiivvaid.
Kommenter denne artikkelen
Tips en venn Gå tilbake