Maid leat plánen geasseluomus hommát?
Nu go dábálaččat de min bearaš luomostallá Sámis. Mii áigut vuordit čuoikka Guovdageainnus, finadit sohkadeaivvadeamis Kárášjogas – kánske finadat vel Lágesduoddaris gos min sogas lea geasseorohat, ovdal go dollet vuoni ja vuohpa lusa Divttasvutnii.
Makkár geassemuittu háliidivččet vajáldahttit?
1994 geasi ledje hirbmat báhkat Finnmárkkus, ja mun ledjen stuoris ja áhpeheapme. In leat goassige leamašan nu báhkkanan go dalle, ii lean veaháge jiella. Dalle mun gal measta dájáskin. Lihku eai bistte báhkat beare guhkká dáppe davvin…
Maid don áinnas borat ja jugat geassebáhkkan?
Illudan váras murjjiid máisttašit, danin lea buorre go min luopmu álgá hui maŋŋit dán jagi, kánske sarrihat háhppehit láddat…
Makkár musihkka addá dutnje geassedovddu?
Boares beakkán lávlagat, sihke sámi ja internašunála beakkán lávlagat 70- ja 80-loguin! Dakkár musihkka mii boktá mánnávuođa- ja nuorravuođamuittuid. Deatnogátte nuorat, Police, Phil Collins. Geassit ferte fas roggat kaseahttačuojanasa…
Maid čájehivččet turisttaide geat fitnet du ruovttubáikkis?
Guovdageainnus lea aiddo rahpasan ođđa fiinna hotealla, muhto dan gal turisttat álkidit ieža gávdnet… Gilišilljus lea somá vázzášit go lea čáppa geassedálki. Muhtumin sii vuvdet njálgáseamos bánnogáhkuid doppe. Jus áiggut oastit maidege Guovdageainnus, de gal fertet finadit silbarávddiin. Ja de han mis leat olu fiinna sajit gili láhkosis, nu mo okta sáttogáddi gos čuoikkat mannet biekka mielde.
Maid barggašit jus beasašit kulturministtarin ovtta beaivái?
Mun gárvešin buot daid sámi huksenáššiid maid leat vuordimin, ja maid leat vuordán máŋggaid jagiid juo! Kulturviesut, teáhterviessu, museat – buot dát gullet Kulturdepartementii, ja sii bidjet ovtta huksenášši boahtit nuppi ovdii.
Ja de ledjen oasálastit sámi kulturdoaluin nu mo geassefestiválain, go doppe ii leat vel oktage kulturministtar astan fitnat.
Leat go mannamin makkárge festiválii dan geasi?
Mus livčče gal hirbmat miella festiválii mannat, muhto go njuoratmánná lea de gal dainna ferten boahtte geassái vuordit. Mu mielas leat buori prográmmat sihke Riddus ja Márkomeannus, ja Skiipagurra-festiválas gal vuoiga in leat vel oba fitnan ge! Dan jagi ferten duhtat Čuovžafestiválii dáppe Guovdageainnus…
Mii botkehivčče du luomostallama?
Go vel unna áššáš ge. Mediačállosat dahje hoahppo-sms sáhttá dagahit ahte váibmu julkigoahtá garraseappot. Danin berrešin várra luomostallat dakkár báikkis gos mobiltelefovnnain ii gulahala ja gos radio ge ii gullo. Mu mielas lea oainnat oalle váttis gávdnat dien boalu mainna jáddada…
Geasselohkamuš?
Dán geasi áiggun lohkat kriminálalaš girjji sámegillii. Lars Vilhelm Svonni lea čállán girjji ”Rihkkut rájiid” sámi akšunisttaid birra Ruoŧa bealde. Mun illudan!
Man haga it birge luomus?
Geassi Sámis mearkkaša čuoikkat, ja dološáigásaš čuoikavuoiddas lea áidna mii de dohkke!
Kommenter denne artikkelen
Tips en venn Gå tilbake