Logje-Sunná, Kirsten Susanne Logje, rabai fáddáčoahkkima. Lei ge hui heivvolaš go son vel juoiggastii Nuorbejávrri. Panelii lei Guovdageainnu Sámiid Searvi čohkken guovddáš olbmuid báikkálaš mátkeealáhusas; Mikkel Issát Eira, Johan Ánde Somby, Anne-Lajla Utsi ja sátnejođiheaddji Klemet Erland Hætta. Sii digaštalle mátkeealáhusa rámmaeavttuid – nu mo Mohtorjohtolatlága – ja erenoamáš hástalusaid mat leat čadnon sámi mátkeealáhusa ovdánahttimii erenoamážit Guovdageainnus. Aili Keskitalo jođihii ságastallama.
Ruskkat ja meahccevuoddjin
Áŋgiris guldaleaddjit ávžžuhedje politihkkariid bargagoahtit riikaviidosaš láhkabargguid ektui, nu mo Mohtorjohtolatláhka. Muhto maiddái báikkálaš váttisvuođat beroštahtii olbmuid; ovdamearkka dihtii leat ruskkat geaidnoguorain vuosttaš maid turisttat oidnet go bohtet Guovdageidnui. Panelas ledje buohkat ovttaoaivilis dasa ahte ovttasbargu ja kvalitehtasihkarastin lea dárbbašlaš jus mátkeealáhus Guovdageainnus galgá nákcet atnit ávkki das ahte hotealla dál lea ráhpasan fas.
Ođđa digaštallan sámi skuvlla birra
- Dát lei min vuosttaš fáddáčoahkkin, ja vaikke eai boahtán ge nu oallugat go leimmet doivon, de mii goit áigut ain lágidit dákkár čoahkkimiid. Čakčii mii leat plánemin fáddáčoahkkima mas sámi skuvla lea fáddán. Mii sávvat ahte dat lea dakkár fáddá mas oallugat beroštit, dadjá Guovdageainnu Sámiid Searvvi jođiheaddji, Aili Keskitalo.
Kommenter denne artikkelen
Tips en venn Gå tilbake