Dás sáhttet leat váikkuhusat vuoigatvuođaid hálddašeapmái máttasámi guovlluin, maid aiddo dál leat digaštallamin.
Koloniahearrát leat čállán min historjjá
- Koloniahearrát dat leat čállán sámi historjjá, eai ge leat doarvái deattuhan sápmelaččaid iežaset áddejumiid ja čilgemušaid, cealká sámediggeáirras Kirsti Guvsám (NSR) preassadieđáhusas.
Buktán stuorra váikkuhusaid
Boastto áddejumit máttasámi historjjá ja ássama birra leat buktán stuorra váikkuhusaid máttasápmelaččaide, erenoamážit boazodollui. Guvsám oaivvilda fertet ođđasit čállit historjjá hehttendihti dán boahttevaš hálddašeamis. Dál son ávžžuha dutkanásahusaid dego Davvi-Trøndelaga Allaskuvlla, NTNU, Sámi Allaskuvlla ja Romssa Universitehta bargagoahtit dáinna. Maiddái Norgga Dutkanráđđi berre dán vuoruhit iežás sámi dutkamis.
Eanet dieđut dárbbašuvvojit
- Dát lea čielga ovdamearka das mo dáruiduhttin ja koloniserenáigi ain otná beaivve ge buktá váikkuhusaid. Dál mii fertet čalmmástuhttit dan duohta máttasámi historjjá, vai mis šaddá buoret diehtovuođđu go galgat veardidit otná vuoigatvuođaid ja hálddašeami, dadjá Guvsám. Son oaivvilda ahte sihke dutkit ja sii geat barget hálddašansystemas dál fertejit váldit vuhtii dáid ođđa dieđuid. Dárbbašuvvojit eanet dieđut sihke máttasámi servodagas ja máttasámi servodaga birra.
Ovdamearkan ođđa arkeologalaš gávdnosiidda lea 2006 rájes, go gávdne 1000 jagi boares sámi ássanbáikki Aursjøen buohta Lesja láhkosis.
Kommenter denne artikkelen
Tips en venn Gå tilbake