Solbakken-Härkönen čujuha dasa ahte stuorámus hástalusat oahpponeavvo ráhkadeamis leat rekrutteret čálliid ja gárvet oahpponeavvuid áigemeriid siste. – Mii fertiimet gávdnat ođđa vugiid čoavdit dáid váttisvuođaid, ja dat leamašan hui dehálaš NSRii. Máŋga dákkár vuogit leat ge danne mielde lávdegotti oktasaš evttohusas, muitala Solbakken-Härkönen.
Oastit oahpaheddjiid friija
NSR oaivvilda ahte ferte gávdnat ja nannet resursabirrasiid gos sáhttá oastit oahpaheddjiid friija.
– Oahpaheaddjit dákkár resursaskuvllain galget sáhttit geavahit olles dahje oasi bargoáiggis oahpponeavvoráhkadeapmái, evttoha Solbakken-Härkönen.
Mo de leat jurddašuvvon dát resursaskuvllat?
- Go máŋggas barget ovttas, de bargu manná njuovžileabbot. Prošeakta ii bisán jus okta buohccá. Sii besset bargat bargoáiggi siskkabealde oahpponeavvuiguin. Dalle maid doalahit vuoigatvuođa buohccidoarjagii ja luopmoruhtii, ja penšuvdnačuoggát ge čoagganit. Dáid buriid han dávjá manahit jus váldet virgelobi bálkká haga, čilge Solbakken-Härkönen.
Ovttasráđiid buoridit oahpponeavvodili
Solbakken-Härkönen deattuha ahte dát ortnet gáibida ovttasbarggu gaskal skuvlaeaiggádiid, Sámi Allaskuvlla, lágádusaid ja Sámedikki.
- Lea dehálaš ahte maiddái skuvlaeaiggádat váldet ovddasvástádusa oahpponeavvodilis. Erenoamážit jus ožžot nuvttá oahpponeavvuid. Sámediggi ges ferte leat álggaheaddji gii oažžu dákkár barggu johtui, ja Sámediggi galgá maid ruhtadit oahpponeavvobarggu. Lágádusat ges stivrejit oahpponeavvoprošeavttaid. Gealbolokten, dahje nu gohčoduvvon etterutdanning, lea maid dehálaš. Dat ges lea skuvlaeaiggáda ovddasvástádus. Oahpu oahpponeavvoráhkadeamis fas sáhttá Sámi Allaskuvla fállat, árvala Solbakken-Härkönen.
- Dás lea sáhka čohkket searaid ja ovttasbargu lea čoavddasátnin, deattuha Solbakken-Härkönen.
NSR oaivvilda ahte resursabirrasat galget leat buot giellaguovlluin ja gokčat buot fágaid ja dásiid maidda lea dárbu ráhkadit oahpponeavvuid. - In jáhke dat lea nu váttis rekrutteret skuvllaid ja gielddaid dákkár ovttasbargui. Kánske muhtin oassi giliskuvllain sáhtašedje doaibmat resursaskuvlan oahpponeavvoráhkadeami oktavuođas, loahpaha Solbakken-Härkönen.
Kommenter denne artikkelen
Tips en venn Gå tilbake