Nils A. Gaup (NSR) oaivvilda ahte haddelassáneapmi boaldámušas čuohcá erenoamáš garrasit sámi guovlluide, go olbmuin eai leat eará molsaeavttut go biila.

Vuolidit CO2 luoitimiid

Gaup lohká iežas áddet ahte bensindivadiid lasiheapmi lea oassin dain doaibmabijuin ahte dustet hástalusaid dálkkádatrievdamiid oktavuođas. Dálkkádatrievdamat dagahit stuorra vahágiid, ja váikkuhit álgoálbmogiid dearvvašvuhtii, eallimii ja birgejupmái. Danne lea ge su mielas deaŧalaš geahččalit vuolidit CO2-luoitimiid.

Bieđgguid ássan ja guhkes gaskkat

Sámedikki ovttajienalaš mearrádusas celko ahte seammás go lea sávahahtti vuolidit CO2-luoitimiid, de ferte atnit deastta das ahte sámi guovlluin lea bieđgguid ássan ja gaskkat leat guhkit. Oktasašjohtolaga vejolašvuođat leat heittogat dahje eai oppa gávdno ge, ja duohtavuođas eai oppa gávdno ge molssaeavttut priváhtabiilii go galgá bargui. 

Buoridit oktasašjohtolatfálaldaga

Bensin- ja dieselhattiid goargŋumis leat stuorra negatiiva váikkuhusat sámi guovlluide. Nils A. Gaup mielas lei ge vuogas dán oktavuođas čuovvolit áirasa Klemet Erland Hætta gáibádusaid ahte buoridit oktasašjohtolatfálaldaga sámi guovlluin. Sámediggi cealká ge mearrádusas ná: - Seammás dagaha bensin- ja dieselhattiid goargŋun áigeguovdilin buoridit oktasašjohtolatfálaldaga. Ferte bargojuvvot dan ala ahte buoridit dán fálaldaga. Ferte maid bargat dan ala ahte ásahit ortnegiid mat jevdejit mohtorboaldámušaid geasehangoluid.

Čuohcá boazodollui

Boazodollui čuhcet bensinhaddegoargŋumat erenoamáš garrasit go ealáhus ferte máksit boaldámušdivada maid eará vuođđoealáhusat eai dárbbaš máksit. Divatdásiid erohus mielddisbuktá struktuvrralaš vealaheami boazodollui go buohtastahttá eará ealáhusaiguin. Sámediggi oaivvilda dát struktuvrralaš vealaheapmi čuohcá vel garraseappot go boaldámušat leat divrasat.