Sámedikki birasságastallamis lei sáhka das movt Sámediggi galgá bargat birashástalusaiguin. Debáhtta lei buorre ja bohte ovdan ollu buorit evttohusat ja áššit.

Birget nuppástusaiguin

- Eanas olbmot atnet duohtan ahte birasnuppástusat buktet hástalusaid ja rievddadeaddji dili, sihke sámi báikegottiide ja ealáhusaide. Sámediggi galggašii nannet ja buoridit sámi báikegottiid vai dat birgejit birasnuppástusaiguin, celkkii Pavall, gii lea Norgga Sámiid Riikkasearvvi (NSR) várrelahttu Sámedikkis.

Barggakeahtes bargu

Sámi servodagat ja ealáhusat fertejit máhttit muhttit ja heivehit iežaset daidda dilálašvuođaide mat nuppástuvvet. – Dákko lea báhcán ollu bargu barggakeahttá, muittuhii Pavall birasságastallamis.

Rámmat váilot

Pavall oaivvilda ahte mii farggamusat galggašeimmet rámmaeavttuid oččodit mat dahket ahte sámi servodat sáhttá hálddašit rievddadeaddji dili, ja heivehit iežas. – Lágaid, šiehtadusaid ja rámmaeavttuid galggašii heivehit vai olbmot ožžot lobi ealáhusa rievdadit ja movttiiduvvet ealáhusaid heivehit, čilgii Pavall.

Sámeráđi dehálaš bargu

Pavall maid deattuhii Sámeráđi barggu hui dehálažžan go Sámeráđđi bargá riikkaidgaskasaččat sihke birasáššiiguin ja eamiálbmotvuoigatvuođaid. – Sámeráđis lea politihkalaš ja morálaš fápmu, ja Sámediggi ferte doarjut Sámeráđi barggu, celkkii Pavall.

Denne artikkelen på norsk